Վրաստանում քրեական գործ են հարուցել Շովի առողջարանում 18 զոհի պատճառ դարձած սողանքի առնչությամբ
Վրաստանի ներքին գործերի նախարարությունը քրեական գործ է հարուցել Ռաչայի բարձրլեռնային երկրամասի Շովի առողջարանային ավանում 18 մարդու կյանք խլած սողանքի առնչությամբ։ «Արմենպրես»-ի փոխանցմամբ՝ այդ մասին լրագրողներին հայտնել են հանրապետության Ներքին գործերի նախարարությունից։
«Միջադեպի առաջին իսկ րոպեներից սկսվել է քրեական հետաքննություն: Գործը հարուցվել է երկու հոդվածներով, սակայն հետաքննության ընթացքում հոդվածները կարող են վերաորակվել», - ՆԳՆ արտակարգ իրավիճակների կառավարման ծառայության ղեկավար Թեյմուրազ Մղեբրիշվիլիի խոսքերն է փոխանցում ТАСС գործակալությունը։
Արտակարգ իրավիճակների կառավարման ծառայության ղեկավարը պարզաբանել է, որ գործը հարուցվել է Վրաստանի Քրեական օրենսգրքի 116-րդ (անզգուշությամբ մահ պատճառելը) և 240-րդ (անվտանգության կանոնների խախտում հանքային, շինարարական կամ այլ աշխատանքներ կատարելիս) հոդվածներով։
Շովիում լայնամասշտաբ սողանքը տեղի ունեցել օգոստոսի 3-ին: Զոհվել է 18 մարդ, ևս 16-ը համարվում է անհայտ կորած։ Վնասվել են կամուրջներ, ճանապարհներ, զբոսաշրջային քոթեջներ և «Սանսեթ Շովի» հյուրանոցը։ Մասնագետների նախնական տվյալներով՝ լեռներից իջել է ավելի քան 5 մլն խմ հող։ Աղետի վայրի ընդհանուր մակերեսը կազմել է 26 հա։ Օգոստոսի 7-ը Վրաստանում է հայտարարվել սգո օր:
Կարծիքներ