Հնդկաստանի դեսպանատունը քաղաքացիներին կոչ է արել ժամանակավորապես լքել Ուկրաինան

Ուկրաինայում Հնդկաստանի դեսպանատունը կոչ է արել իր քաղաքացիներին ժամանակավորապես լքել երկիրը՝ ստեղծված իրավիճակի անորոշության պատճառով։

«Ներկայիս իրավիճակի անորոշության պատճառով Ուկրաինայում գտնվող Հնդկաստանի քաղաքացիները, հատկապես  ուսանողները, որոնց մնալն անհրաժեշտություն չէ, կարող են մտածել ժամանակավոր հեռանալու մասին: Հնդկաստանի քաղաքացիներին նաև խորհուրդ է տրվում խուսափել դեպի Ուկրաինա բոլոր ոչ էական ճանապարհորդություններից», – ասվում է դեսպանատան կայքում հրապարակված հայտարարության մեջ։

Դիվանագիտական ​​ներկայացուցչությունը նաև կոչ է արել Հնդկաստանի քաղաքացիներին տեղեկացնել դեսպանատանը Ուկրաինայում իրենց գտնվելու վայրի մասին, որպեսզի անհրաժեշտության դեպքում հնարավոր լինի կապ հաստատել։

«Դեսպանատունը շարունակում է իր բնականոն աշխատանքը՝ բոլոր ծառայությունները մատուցելով Ուկրաինայում գտնվող Հնդկաստանի քաղաքացիներին», – նշել է դեսպանատունը։

Կիևը և արևմտյան երկրները վերջերս մտահոգություն են հայտնել Ուկրաինայի սահմանների մոտ Ռուսաստանի կողմից «ագրեսիվ գործողությունների» ենթադրյալ աճի կապակցությամբ։ Մոսկվան բազմիցս հերքել է նման մեղադրանքները՝ ասելով, որ ոչ ոքի չի սպառնում և մտադիր չէ հարձակվել որևէ մեկի վրա, իսկ «ռուսական ագրեսիայի» պնդումներն օգտագործվում են որպես պատրվակ՝ Ռուսաստանի սահմանների մոտ ՆԱՏՕ-ի ավելի շատ ռազմական տեխնիկա տեղակայելու համար։