Հայ շախմատիստուհիները Չեխիայում մասնակցում են Եվրոպայի անհատական առաջնությանը

Չեխիայի մայրաքաղաք Պրահայում ընթանում է Եվրոպայի շախմատի կանանց անհատական առաջնությունը, որին հաջող են հանդես գալիս նաև Հայաստանի ներկայացուցիչները:

Եվրոպայի անհատական առաջնությանը հայ 6 շախմատիստուհի է մասնակցում:

Կայացած երեք տուրերից հետո առաջատարների թվում է Եվրոպայի գործող չեմպիոն, գրոսմայստեր Էլինա Դանիելյանը: Նա երեք հաղթանակ է տարել և 3 միավորով կիսում է 1-5-րդ տեղերը։ 3-րդ տուրում Դանիելյանն առավելության է հասել Հունգարիայի ներկայացուցիչ Ժոկա Գաալիի նկատմամբ: Երկրորդ տուրում էլ Դանիելյանն առավելության է հասել Հայաստանի մյուս ներկայացուցչի՝ Մարիամ Մկրտչյանի նկատմամբ:

Երրորդ տուրում Հայաստանի ներկայացուցիչներից հաղթանակ է տարել նաև Լիլիթ Մկրտչյանը՝ առավելության հասնելով Նիդեռլանդները ներկայացնող հայազգի շախմատիստուհի Աննա-Մաջա Ղազարյանի նկատմամբ: Նա իր ակտիվում ունի 2,5 միավոր և կիսում է 6-16-րդ տեղերը:

Հաղթանակներ են տարել նաև Մարիա Գևորգյանն ու Մարիամ Մկրտչյանը, որոնք 2-ական միավոր ունեն իրենց ակտիվում:

ԵԱ-ում իր առաջին միավորն է վաստակել նաև Սուսաննա Գաբոյանը՝ առավելության հասնելով անգլիացի Լուիզա Հեադի նկատմամբ:

Երրորդ տուրում իր առաջին պարտությունն է կրել Աննա Սարգսյանը: Նա սպիտակ խաղաքարերով զիջել է ուկրաինուհի Անաստասիա Ռախմանգուլովային և այժմ 1,5 միավոր ունի իր ակտիվում:

Եվրոպայի առաջնությունում կանցկացվի 11 տուր։