Կոչ ենք անում միջազգային հանրությանը քայլեր ձեռնարկել՝ դադարեցնելու Ադրբեջանի ապօրինի գործողությունները․ Էդուարդ Աղաջանյան
ՀՀ Ազգային ժողովի պատգամավոր Էդուարդ Աղաջանյանը ֆեյսբուքի իր էջում գրել է․
«Օգոստոսի 30-ը խորհրդանշական է միջազգային մարդասիրական իրավունքի և մարդու իրավունքների միջազգային իրավունքի նորմերի կարևորության մասին բարձրաձայնելու տեսանկյունից, քանի որ 2010թ․ ՄԱԿ-ի Գլխավոր ասամբլեայի կողմից այն հռչակվել է որպես Բռնի անհետացումների զոհերի միջազգային օր։
Տվյալ համատքստում հարկ եմ համարում եւս մեկ անգամ հրավիրել միջազգային գործընկերների ուշադրությունը Հայաստանի Հանրապետության համար օրակարգային հարցերից մեկին, այն է ՝ Ադրբեջանում ապօրինաբար պահվող հայ ռազմագերիների և քաղաքացիական անձանց անհապաղ և անվերապահ ազատ արձակումը։
Նույնիսկ հաշվի առնելով առկա ապացույցները վերոգրյալի մասին, Ադրբեջանական իշխանությունները շարունակաբար հերքում են պատանդառության մեջ գտնվող անձանց, ինչպես նաև նրանց նկատմամբ անմարդկային վերաբերմունքի և խոշտանգումների անհերքելի փաստը։
Նմանօրինակ իրավական կամայականությունները չպետք է տեղ գտնեն ժամանակակից և առողջ հասարակությունում, լինելով անթույլատրելի՝ մարդուն վերապահված անքակտելի իրավունքների խախտման տեսանկյունից։
Չնայած Ադրբեջանական իշխանությունների կողմից որդեգրած հայատյաց քաղաքականության ակնհայտ դրսևորումներին, բարձր է գնահատվում մի շարք պետությունների և միջազգային կառույցների պատշաճ արձագանքն ու սատարումը՝ ուղղված իրավիճակի կայունացմանը։
Այսպիսով, կոչ ենք անում միջազգային հանրությանը և մարդու իրավունքների հարցերով զբաղվող միջազգային կազմակերպություններին առավել ակտիվ կերպով քայլեր ձեռնարկել՝ օր առաջ դադարեցնելու Ադրբեջանի ապօրինի գործողությունները»։
Կարծիքներ