Բայդենն ու Թրամփն ապահովել են իրենց թեկնածության առաջադրումը նոյեմբերյան ընտրություններին

ԱՄՆ նախագահ Ջո Բայդենը և նախկին նախագահ Դոնալդ Թրամփը նախնական ընտրությունների արդյունքներով արդեն ապահովել են իրենց թեկնածության առաջադրումը նոյեմբերին կայանալիք նախագահական ընտրություններում։ «Արմենպրես»-ի փոխանցմամբ՝ այս մասին հաղորդում է CNN-ը։

Բայդենը դեռ մինչև Ջորջիայում, Վաշինգտոնում, Միսիսիպիում և Հավայան կղզիներում անցկացվող նախնական ընտրություններում (փրայմերիզ) ձայների վերջնական հաշվարկն արդեն հավաքել էր բավական թվով պատվիրակներ, որպեսզի իրեն ապահովի Դեմոկրատական ​​կուսակցությունից ԱՄՆ նախագահի պաշտոնում իր առաջադրումը:

Հաշվի առնելով մյուս նահանգներում փրայմերիզների և կոկուսների (քաղաքական կուսակցության կողմնակիցների կամ անդամների ոչ պաշտոնական հանդիպումների) արդյունքները՝ Բայդենն արդեն ապահովել է կուսակցության առաջիկա համագումարի 1972 պատվիրակների աջակցությունը, երբ որպես պետության ղեկավարի պաշտոնի թեկնածու առաջադրվելու համար անհրաժեշտ է առնվազն 1968 ձայն:

Հեռուստաալիքը կանխատեսում է, որ նախագահական ընտրություններում Բայդենի հավանական մրցակիցը` Հանրապետական ​​կուսակցությունից նախկին նախագահ Դոնալդ Թրամփը, նույնպես կապահովի կուսակցական համագումարի բավական թվով պատվիրակների աջակցությունն ընտրություններում որպես նախագահի թեկնածու առաջադրվելու համար։ Մարտի 12-ի երեկոյի դրությամբ, CNN-ի տվյալներով, նա ունի 1144 ձայն՝ անհրաժեշտ նվազագույն 1215 ձայնի դեպքում:

ԱՄՆ նախագահական ընտրությունները նշանակված են 2024 թվականի նոյեմբերի 5-ին։