Իրանում հարյուրավոր քաղծառայողներ ցույցի են դուրս եկել աշխատավարձերի բարձրացման պահանջով

Իրանի արդարադատության ոլորտի քաղծառայողները բողոքի ակցիաներ են անցկացրել։ Կիրակի օրը Թեհրանի հրապարակում հարյուրավոր մարդիկ են հավաքվել՝ պահանջելով բարձրացնել աշխատավարձը։

Ըստ իրանական լրատվամիջոցների՝ երկրի տարբեր քաղաքներում ցույցեր են տեղի ունեցել նաև շաբաթ օրը։ Ցուցարարները բողոքել են այն բանի դեմ, որ խորհրդարանը մերժել է նրանց աշխատավարձը բարձրացնելու պահանջը։

VoA լրատվամիջոցը հաղորդում է, որ դատական իշխանության ղեկավարի պաշտոնում գտնվելու վերջին շաբաթներին Իրանի ներկայիս նախագահ Իբրահիմ Ռաիսին խոստացել էր բարձրացնել ոլորտի աշխատողների աշխատավարձը, սակայն նախագահի պաշտոնը ստանձնելուց հետո նրա կառավարությունը հրաժարվել է անել դա։