Դեսպան Ներսեսյանը Օքսֆորդի համալսարանի ուսանողներին է ներկայացրել հայ-թուրքական հարաբերությունների կարգավորման հնարավորությունները

Մեծ Բրիտանիայի և Հյուսիսային Իռլանդիայի Միացյալ Թագավորությունում Հայաստանի Հանրապետության արտակարգ և լիազոր դեսպան Վարուժան Ներսեսյանն այսօր ՀՀ դեսպանությունում հյուրընկալել է Օքսֆորդի համալսարանի դիվանագիտական բաժնի ուսանողներին՝ պրոֆեսոր և նախկին ՄԹ դեսպան Ջոն Բեյերի ղեկավարությամբ։

Հանդիպման ընթացքում դեսպանը ներկայացրել է Հայաստանի արտաքին քաղաքական առաջնահերթությունները, ՀՀ-ՄԹ փոխգործակցության զարգացման իր տեսլականը, ԼՂ հիմնահարցի պատմությունը և 2020 թ․ Ադրբեջանի և Թուրքիայի ռազմական ագրեսիայից հետո Արցախի շուրջ ձևավորված ներկա իրավիճակը, հայ-թուրքական հարաբերությունների կարգավորման հնարավորությունները, Հայոց ցեղասպանության ճանաչման գործընթացը։

Դեսպանը նաև պատասխանել է ուսանողների մի շարք հարցերի, որոնք վերաբերում էին Հայաստանի արտաքին քաղաքականությանը, տնտեսական ներուժին և Միացյալ Թագավորության հետ հարաբերություններին։