Ավստրալիայում մի կին հոսպիտալացվել է շնաձկան հարձակման հետևանքով

Սիդնեյի նավահանգստում մի կին հոսպիտալացվել է շնաձկան հարձակման հետևանքով։ Տուժածի վիճակը շարունակում է մնալ ծանր, հայտնում է NSW ոստիկանությունը։

Գերատեսչության տվյալներով՝ դեպքը տեղի է ունեցել երկուշաբթի երեկոյան։ Տուժածը ծայրահեղ ծանր վիճակում շտապօգնության ավիացիոն ուղղաթիռով տեղափոխվել է հիվանդանոց։ Ըստ բժիշկների՝ 29-ամյա կինը «ոտքի ծանր վնասվածքներ է ստացել և շատ արյուն է կորցրել՝ շնաձկան հարձակման հետևանքով»։ Հաղորդվում է նաև, որ գիշատչի հարձակումից անմիջապես հետո տուժածին առաջին օգնություն է ցուցաբերել մոտակայքում գտնվող անասնաբույժը:

Միջադեպից հետո քաղաքային իշխանությունները ժամանակավորապես փակել են Սիդնեյի լողափերը և սկսել շնաձկան որոնումները՝ կոչ անելով մարդկանց «մինչև հետագա ծանուցում հեռու մնալ Սիդնեյի նավահանգստի ջրից»:

Մարդու վրա շնաձկան հարձակման այս դեպքն առաջինն էր Ավստրալիայում 2024 թվականին։ Անցած տարվա ընթացքում երկրում գրանցվել է շնաձկների 12 հարձակում մարդկանց վրա։ Դրանցից 3-ն ավարտվել է զոհերի մահով։