Հայաստանի ծանրամարտի հավաքականները հավաք են անցկացնում

Տոկիոյի օլիմպիական խաղերին ընդառաջ՝ հունվարի 12 –ից  Հայաստանի  տղամարդկանց ծանրամարտի հավաքականը ուսումնամարզական հավաք է սկսել Ծաղկաձորում , իսկ կանանցը ՝ Օլիմպավանում: Այս մասին տեղեկացնում է ՀԱՕԿ-ի կայքը:

Թիմերում  ընդգրկված են շուրջ  40 մարզիկ –մարզուհիներ: Նրանց առողջական վիճակին հետևում են նաև բժիշկներն ու մերսողները:

Նշվում է, որ ծանրորդների  նախնական մարզավիճակի մասին մասնագետներն ընդհանուր կարծիք կկազմեն փետրվարի 1-7-ն անցկացվելիք Հայաստանի առաջնությունում, որին նորից կհաջորդեն  հավաքներ և մարզումներ, որոնցում մասնագետները պետք է ընտրեն այն ծանրորդներին, որոնք մեր երկիրը կներկայացնեն Մոսկվայում ապրիլի 1-ին  մեկնարկելիք Եվրոպայի առաջնությունում:

Մրցաշարը  օլիմպիական՝ վարկանիշային  է և ըստ մրցակարգի՝ պետք է իրենց ունակությունները դրսևորեն այն մարզիկները, որոնք խաղեր մեկնելու համար պետք մասնակցեն միջազգային վարկանիշային առնվազն  վեց մրցաշարի:

ՀՀ հավաքականի գլխավոր մարզիչ Փաշիկ Ալավերդյանի խոսքը մեջբերելով՝ կայքը գրում է, որ, ըստ էության,  մեր երկիրը  մոսկովյան  ստուգատեսում  կներկայացնեն  10 տղամարդ և 5 կին: