ԵՄ դիտորդներն այցելել են ադրբեջանական կրակոցների տակ գտնվող Երասխի մետալուրգիական գործարանի տարածք. Կոստանյան

Երասխում կառուցվող գործարանի տարածք են այցելել Հայաստանում գտնվող ԵՄ քաղաքացիական դիտորդական առաքելության անդամները:

Այս մասին «Թվիթեր»-ի իր միկրոբլոգում գրել է ՀՀ ԱԳ փոխնախարար Վահան Կոստանյանը:

Գրառման մեջ մասնավորապես ասված է.

«ԵՄ դիտորդներն այցելել են Երասխի մետալուրգիական գործարանի կառուցման տարածք, որը գտնվում էր ադրբեջանական կրակոցների տակ»:

Այսօր՝ ժամը 11:45-ի սահմաններում, ադրբեջանական զինված ուժերը կրակ էին բացել Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ, կրակոցների հետևանքով վիրավորում էր ստացել օտարերկրյա 2 քաղաքացի: Ավելի ուշ հայտնի դարձավ, որ վիրավորում ստացած օտարերկրյա քաղաքացիներն ազգությամբ հնդիկ են։ ԱՆ-ն հայտնել է, որ նրանք վիրահատվել են:

Այսօր՝ ժամը 13:45-ին, Ադրբեջանի ԶՈՒ ստորաբաժանումները տարբեր տրամաչափի հրաձգային զենքերից կրկին կրակ էին բացել Երասխի հատվածում տեղակայված հայկական դիրքերի ուղղությամբ:

Հիշեցնենք՝ երեկ էլ՝ ժամը 18:40-ին, Ադրբեջանի ԶՈՒ ստորաբաժանումները տարբեր տրամաչափի հրաձգային զենքերից կրակ էին բացել Երասխի հատվածում տեղակայված հայկական դիրքերի ուղղությամբ, վնասվել էին քաղաքացիական ավտոմեքենա և այլ օբյեկտ: