Եվրոպական եռյակը կոչ է արել Իրանին՝ հրաժարվել միջուկային ծրագրի ընդլայնումից
Եվրոպական եռյակը Իրանին կոչ է անում հրաժարվել միջուկային ծրագրի ընդլայնումից և վերացնել իրանական միջուկային օբյեկտներ ՄԱԳԱՏԷ-ի մուտքի սահմանափակումները: Այս մասին ասվում է Ֆրանսիայի, Գերմանիայի և Մեծ Բրիտանիայի արտաքին գործերի նախարարությունների պաշտոնյաների համատեղ հայտարարության մեջ՝ հաղորդում է ՏԱՍՍ-ը:
«Իրանի վերջին հայտարարությունը Նաթանզում ուրանի հարստացման գործարանում երեք նոր ցենտրիֆուգաների կասկադների տեղադրման ծրագրի մասին հակասում է Գործողությունների համատեղ համապարփակ ծրագրին (JCPOA) և խոր մտահոգություն առաջացնում»,- ասված է հայտարարության մեջ:
Ինչպես նշում են երեք երկրների արտգործնախարարությունների ներկայացուցիչները, «եթե Իրանը լուրջ է տրամադրված դիվանագիտական տարածքի պահպանման հարցում, ապա չպետք է կիրառի այդ միջոցները»:
Դեկտեմբերի 4-ին Reuters գործակալությունը, վկայակոչելով ՄԱԳԱՏԷ-ի զեկույցը, հաղորդեց, որ Իրանի իշխանությունները մտադիր են IR-2 մ բարելավված ցենտրիֆուգաների լրացուցիչ երեք կասկադ տեղադրել Նաթանզի ուրանի հարստացման ստորգետնյա գործարանում: Այնտեղ ներկայումս գործում է IR-2m ցենտրիֆուգայի մեկ կասկադ, որն աշխատանքը սկսել է նոյեմբերի կեսերին: Միևնույն ժամանակ, միջուկային գործարքի պայմանների համաձայն, Իրանը կարող է ուրան հարստացնել միայն IR-1 ցենտրիֆուգաներով:
Կարծիքներ