«Պատժամիջոցներն ու շանտաժը չեն աշխատի»․ Կոբախիձե

Վրաստանի վարչապետ Իրակլի Կոբախիձեն մեկնաբանել է «Վրացական երազանքի» հիմնադիր և պատվավոր նախագահ Բիձինա Իվանիշվիլիի նկատմամբ ԱՄՆ պատժամիջոցների սահմանումը։

«Շանտաժը, ճնշումը, սպառնալիքները, որոնք իրականացվում են Վրաստանի դեմ, բացարձակապես չեն աշխատում։ Ընդդիմությունն ստիպված է քայլեր ձեռնարկել, որոնք, ի վերջո, կհանգեցնեն ընտրությունների օրինականության համընդհանուր ճանաչմանը»,- ասել է նա։

Իվանիշվիլին դե ֆակտո պատժամիջոցների տակ էր, երբ հրաժարվեց զոհաբերել Վրաստանի ազգային շահերը, ասել է Կոբախիձեն։

Նա նշել է նաև, որ դեռևս 2016 թվականին Միացյալ Նահանգները փորձել էր սառեցնել Իվանիշվիլիի ակտիվները շվեյցարական Credit Suisse բանկում՝ պատճառաբանելով պատժամիջոցների սահմանափակումները։ Վեճը ծագել է նրա դրամական միջոցների կառավարման վերաբերյալ պահանջների և դրա հետ կապված դատական ​​գործընթացների շուրջ:

Սակայն 2024 թվականին Սինգապուրի դատարանը բանկին պարտավորեցրել էր միջոցները վերադարձնել Իվանիշվիլիին՝ ճանաչելով ակտիվների կառավարման խախտումները։