Հյուսիսային Կորեան գնահատեց պատերազմը պաշտոնապես դադարեցնելու Սեուլի առաջարկը

ԿԺԴՀ-ն պատերազմի ավարտը հայտարարելու Սեուլի առաջարկը լավ գաղափար է համարում, ճիշտ ժամանակին և նման քննարկման համար անհրաժեշտ պայմաններին համապատասխան: Այս մասին ասվում է Հյուսիսային Կորեայի կենտրոնական հեռագրական գործակալության կողմից հրապարակված հայտարարությունում, որը վերագրվում է ԿԺԴՀ առաջնորդ Կիմ Չեն Ընի քրոջը և Կորեայի աշխատավորական կուսակցության կենտրոնական կոմիտեի վարչության պետի տեղակալ Կիմ Յե Յոնգին:

Ավելի վաղ հաղորդվել էր, որ Հարավային Կորեայի նախագահ Մուն Չժե Ինը, ելույթ ունենալով ՄԱԿ-ի Գլխավոր ասամբլեայի նստաշրջանի բարձր մակարդակի շաբաթում, ևս մեկ անգամ առաջարկել է ԱՄՆ-ի և Չինաստանի ներկայությամբ պատերազմի ավարտ հայտարարել Կորեական թերակղզում: Նրա կարծիքով՝ դա հնարավորություն կտա անդառնալի առաջընթացի հասնել Կորեական թերակղզու ապամիջուկայնացման գործում:

Նրա խոսքերով` ԿԺԴՀ-ն նախկինում բազմիցս քննարկել է նման հռչակագրի ընդունման հարցը, քանի որ հասկանում է դրա «անհրաժեշտությունը», իսկ պատերազմի ավարտի հայտարարության մեջ «ոչ մի վատ բան չկա»: Բայց դրա համար անհրաժեշտ է հասկանալ ՝ արդյոք «հիմա ճիշտ ժամանակն է», և «արդյոք բոլոր պայմանները բավարարված են» նման քննարկման համար:

Կիմ Յե Յունգի խոսքերով ՝ Հարավային Կորեան պետք է սկսի խաղաղության համար պայմաններ ստեղծել, այլ ոչ թե պարզապես խոսել դրան հասնելու իր «թվացյալ անկեղծ ցանկության» մասին:

«Պատերազմի ավարտը հայտարարելու համար երկու կողմերի միջև պետք է երաշխավորվի փոխադարձ հարգանքը:  Եվ սկզբից պետք է հրաժարվել նախապաշարմունքներից և սարսափելի թշնամական քաղաքականությունից, մյուս կողմի նկատմամբ անարդար երկակի ստանդարտներից… Միայն երբ նման նախապայմանները հասունանան, հնարավոր կլինի նստել միմյանց դիմաց և հայտարարել պատերազմի ավարտը, ինչպես նաև փորձել քննարկել միջկորեական հարաբերությունները և Կորեական թերակղզու ապագայի խնդիրները»,- ասել է Կիմ Չեն Ընի քույրը։