Ինչ տեսք ունի Ուկրաինայում ռազմական գործողությունների հետևանքով խոցված աշխարհի ամենամեծ տրանսպորտային օդանավը (լուսանկարներ)

Նոր լուսանկարներ են հայտնվել աշխարհի ամենամեծ տրանսպորտային ինքնաթիռի՝ ԱՆ-225 «Մրիա»-ից, որը ոչնչացվել է ուկրաինական Հոստոմելի օդակայանի գրավման ժամանակ։

Ինչպես գրում է rbc.ua-ն, այն համաշխարհային ավիացիայի պատմության մեջ ամենամեծ և ամենաբեռնատարողունակ ինքնաթիռն էր, որը ստեղծվել էր մեկ օրինակով։

Նշենք, որ ներխուժման պահին օդանավակայանում ինքնաթիռը վերանորոգվում էր, ուստի չի հասցրել օդ բարձրանալ Ուկրաինայից։

Ուկրաինայի իշխանությունների փոխանցմամբ՝ ինքնաթիռը կվերականգնվի ռուսական կողմի հաշվին։ Դրա համար կպահանջվի մոտ 3 մլրդ դոլար։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։