Հայ-ռուսական փոխգործակցության խորացում՝ ի նպաստ տարածաշրջանի բնապահպանական խնդիրների լուծման

Նևյան միջազգային բնապահպանական 9-րդ համաժողովին մասնակցության նպատակով Սանկտ Պետերբուրգ աշխատանքային այցի ընթացքում Շրջակա միջավայրի նախարարի պաշտոնակատար Ռոմանոս Պետրոսյանը երկկողմ աշխատանքային հանդիպում է ունեցել ՌԴ բնական պաշարների և էկոլոգիայի նախարար Ալեքսանդր Կոզլովի հետ։

Հանդիպմանը մասնակցել են Սանկտ Պետերբուրգում ՀՀ գլխավոր հյուպատոսի խորհրդական Վ․ Սարգսյանը, նախարարի պաշտոնակատարի օգնական Ա․ Պապյանը, Ռոսհիդրոմետի ղեկավար Ի․ Շումակովը, Ռոսլեսխոզի ղեկավար Ի․ Սովետնիկովը, ՌԴ բնական պաշարների և էկոլոգիայի նախարարության միջազգային համագործակցության և կլիմայական փոփոխությունների բաժնի ղեկավար Կ․ Ալեքսանդրովիչը և ՌԴ բնական պաշարների և էկոլոգիայի նախարարի օգնական Նուրիդին Ռախմանջանովիչը։

Ողջունելով ռուս գործընկերներին՝ նախարարի պաշտոնակատար Ռոմանոս Պետրոսյանը հույս է հայտնել, որ այս հանդիպումը նոր խթան կհաղորդի երկկողմ համագործակցությանը և կօգնի լուծել բնապահպանության ոլորտի կոնկրետ խնդիրներ՝ նպաստելով բնական պաշարների խնայողաբար օգտագործմանը և դրական անդրադառնալով ընդհանուր տարածաշրջանի բնապահպանական խնդիրների լուծման վրա։

Հայաստանի Հանրապետությունում բնապահպանության ոլորտի կառավարման քաղաքականությունն ուղղված է շրջակա միջավայրի և բնական ռեսուրսների համալիր պաշտպանությանը, բարելավմանը, վերականգնմանը և դրանց ռացիոնալ օգտագործմանը՝ սոցիալական արդարության և տնտեսական արդյունավետության հավասարակշռման սկզբունքի պահպանությամբ։

Կողմերը բարձր են գնահատել ՀՀ շրջակա միջավայրի նախարարության և ՌԴ բնական պաշարների և էկոլոգիայի նախարարության միջև համագործակցությունը և այդ համատեքստում քննարկել երկկողմ նոր ծրագրին առնչվող հարցեր:

Նախարարի պաշտոնակատարը շնորհակալություն է հայտնել Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի տեխնիկական և ինստիտուցոնալ կարողությունների զարգացմանն ուղված համատեղ ծրագրի համար․ ռուսական կողմի աջակցությամբ արդիականացվել է եղանակային կայանների 40 տոկոսը։ Հայաստանի կառավարությունը հույս ունի շարունակել արդյունավետ համագործակցությունը՝ աջակցություն ակնկալելով Ռուսաստանի Դաշնությունից ծրագրի երկրորդ փուլի իրականացման գործում:

Անդրադարձ է կատարվել նաև անտառկառավարման ոլորտին։ Նախարարի պաշտոնակատարն իր ռուս գործընկերներին է ներկայացրել «10 մլն ծառ» նախաձեռնությունը և դրա շրջանակում Հայաստանի անտառածածկ տարածքներն ընդլայնելու հավակնոտ ծրագրերը։ Նախաձեռնության շրջանակում համապատասխան գրություն է ուղարկվել նաև ՌԴ բնական պաշարների և էկոլոգիայի նախարարություն՝ ակնկալելով աջակցություն տնկիների տրամադրման հարցում։

Շրջակա միջավայրի նախարարությունն աշխատում է ռուսական կողմի հետ կնքվելիք հուշագրի նախագծի վրա։ Օգտվելով հնարավորությունից՝ երկու կողմերի փոխգործակցության և համատեղ իրականացվող ծրագրերի աշխուժացման համատեքստում նախարարի պաշտոնակատարն իր ռուս գործընկերոջը հրավիրել է Հայաստան, որի ժամանակ էլ կկնքվի փոխադարձ հուշագիրը։

Ռոմանոս Պետրոսյանը տեղեկացրել է, որ հուշագրով սահմանված համագործակցային կետերից մեկի՝ դժվար վերամշակվող թափոնների շրջանառությունից դուրսբերման ծրագրերի շրջանակում Հայաստանում մեկնարկել է միանգամյա օգտագործման պլաստիկ տոպրակների և տարաների օգտագործման փուլային արգելքի գործընթաց։

Ռոմանոս Պետրոսյանը և Ալեքսանդր Կոզլովը քննարկել են բնապահպանական ոլորտում հայ-ռուսական համագործակցության հետագա զարգացմանը վերաբերող հարցեր: Կողմերը համակարծիք են եղել, որ առկա է չօգտագործված մեծ ներուժ, և պետք է գործնական քայլեր ձեռնարկել այն իրացնելու ուղղությամբ:

Հանդիպման ավարտին նախարարի պաշտոնակատար Ռոմանոս Պետրոսյանը ՌԴ բնական պաշարների և էկոլոգիայի նախարարին ի հիշատակ և որպես երախտիք՝ նվիրել է «Կովկասյան ընձառյուծի» արծաթե հուշադրամ և Հայաստանի Հանրապետության Կարմիր գրքի օրինակ։