Արթուր Դավթյանը ևս երեք ոսկե մեդալ է նվաճել, օղակների վարժությունում հաղթել է Արթուր Ավետիսյանը

Արթուր Դավթյանը ևս երեք ոսկե մեդալ է նվաճել, օղակների վարժությունում հաղթել է Արթուր Ավետիսյանը

Հրանտ Շահինյանի և Ալբերտ Ազարյանի անվան մարզադպրոցներում ավարտվեցին սպորտային մարմնամարզության Հայաստանի տղամարդկանց և կանանց առաջնությունները:

Փետրվարի 26-ին տեղի ունեցան առանձին գործիքների վրա վարժությունների եզրափակիչները։ Տղամարդկանց առաջնությունում ամենահետաքրքիր պայքարը ծավալվել էր օղակների վրա, որտեղ հանդես էին գալիս Համաշխարհային ուսանողական խաղերի կրկնակի չեմպիոն, աշխարհի գավաթի խաղարկությունների հաղթող Արթուր Թովմասյանը, Եվրոական խաղերի չեմպիոն Վահագն Դավթյանը, համաշխարհային ուսանողական խաղերի չեմպիոն Արթուր Ավետիսյանը, բազմամարտում Հայաստանի չեմպիոն Արթուր Դավթյանը, երիտասարդ մարմնամարզիկներ Գագիկ Խաչիկյանն ու Արմեն Պետրոսյանը։ Հայաստանի չեմպիոնի կոչումը ուժեղ մրցակցությունում նվաճեց Արթուր Ավետիսյանը։ Վահագն Դավթյանը զբաղեցրեց երկրորդ տեղը, իսկ Արթուր Դավթյանը եզրափակեց մրցանակային եռյակը։ Արթուր Թովմասյանն այս անգամ բավարարվեց 4-րդ տեղով։

Նժույգ թափեր վարժությունում հերթական անգամ իրեն հավասարը չի ունեցել Հարություն ՄԵրդինյանը։ Արծաթե մեդալը բաժին է հասել Արթուր Դավթյանին, երրորդ տեղը զբաղեցրել է Մամիկոն Խաչատրյանը։ Պտտաձողի վրա վարժությունում չեմպիոն է դարձել Գագիկ Խաչիկյանը, Արթուր Դավթյանը այստեղ կրկին երկրորդն է եղել, իսկ բրոնզե մեդալակիր է դարձել Սամվել Զաիմցյանը։ Մյուս երեք վարժություններում մրցակցոււթյունից դուրս է եղել Արթուր Դավթյանը։ Նա չեմպիոնի կոչումը նվաճել է ազատ վարժություններում, հենացատկում և զուգափայտերում։ Ազատ վարժությունում մրցանակակիներ են դարձլ նաև Գագիկ Խաչիկյանն ու Նորայր Հովհաննիսյանը, հենացատկում՝ Արմեն Պետրոսյանը և Դավիթ Պետրոսյանը, զուգափայտերում՝ Գագիկ Խաչիկյանն ու Արմեն Պետրոսյանը։

Այսպիսով, Արթուր Դավթյանը այս առաջնությունում նվաճեց 4 ոսկե (ևս մեկը՝ բազմամարտում)․ 2 արծաթե և մեկ բրոնզե մեդալ։

Կանանց առաջնությունում նորից մրցակցությունից դուրս է եղել Աննա Գրիգորյանը։ Նա բազմամարտում նվաճած չեմպիոնությանը ևս երեք ոսկե մեդալ է գումարել՝՝ հաղթող դառնալով հենացատկում, զուգափայտերում և հավասարակշռության գերանի վրա վարժությունում։ Ազատ վարժություններում Գրիգորյանը երկրորդն է եղել՝ զիջելով Ինեսա Ջաղինյանին։ Հենացատկում մրցանակակիրներ են դարձել նաև Մանե Պողոսյանն ու Անի Եղիկյանը, Զուգափայտերում՝ Մանե Պողդոսյանը և Տաթևիկ Սուքիասյանը, հավասարակշռության գերանի վրա վարժությունում՝ Աննա Մանթաշյանն ու Ինեսա Ջաղինյանը։ Ազատ վարժություններում բրոնզե մեդալակիր է դարձել Աննա Մանթաշյանը։