ԱՀԿ-ն մեկնաբանել է AstraZeneca-ի պատվաստանյութի շուրջ իրավիճակը

Կորոնավիրուսի դեմ շվեդ-բրիտանական AstraZeneca ընկերության ստեղծած պատվաստանյութի անվտանգության վերաբերյալ Առողջապահության համաշխարհային կազմակերպության փորձաքննության արդյունքները կլինեն այս շաբաթվա ընթացքում։ Այս մասին РИА Новости գործակալությանը հայտնել է ԱՀԿ-ի պաշտոնական ներկայացուցիչ Մարգարեթ Հարիսը։

«ԱՀԿ-ի պատվաստանյութերի անվտանգության հարցերով խորհրդատվական կոմիտեն համակարգված կերպով դիտարկում է COVID-19-ի դեմ պատվաստանյութերի վերաբերյալ բոլոր անվտանգության ազդանշանները և առաջարկություններ անում ԱՀԿ-ին ցանկացած նոր անվտանգության ազդանշանի վերաբերյալ: Կոմիտեն մանրակրկիտ կերպով ուսումնասիրում է AstraZeneca-ի պատվաստանյութին առնչվող ընթացիկ զեկույցները: Երբ ԱՀԿ-ն լիովին պատկերացնի իրավիճակը, արդյունքները անմիջապես կհրապարակվեն: Մենք ակնկալում ենք, որ դա տեղի կունենա մոտ մեկ շաբաթվա ընթացքում»,- ասել է նա:

Հարիսը նշել է, որ տվյալ պահին չկան ապացույցներ առ այն, որ միջադեպերը կապված են պատվաստանյութի հետ․ հարկավոր է շարունակել պատվաստումների հետ կապված արշավը՝ փրկելու կյանքեր և խուսափելու հիվանդության բարդացումներից։

ԱՀԿ-ի ներկայացուցիչը հայտնել է, որ Եվրոպայի մի շարք երկրներում կասեցրել են պատվաստանյութի կոնկրետ խմբաքանակների օգտագործումը, որոշ երկրներում էլ դա արվել է միայն որպես նախազգուշական միջոցառում։

Մարգարեթ Հարիսը հիշեցրել է, որ Մեծ Բրիտանիայում AstraZeneca-ի պատվաստանյութը ստացել է ավելի քան 10 միլիոն մարդ, որոնց մոտ լուրջ կողմնակի ազդեցություններ չեն արձանագրվել։

Հիշեցնենք՝ ԱՀԿ-ի տվյալներով՝ մարտի 8-ի դրությամբ ԵՄ երկրներում և Մեծ Բրիտանիայում հայտնաբերվել է խորը երակների թրոմբոզի 15 դեպք, ինչպես նաև թոքային զարկերակի թրոմբոէմբոլիայի 22 դեպք այն մարդկանց շրջանում, ովքեր ստացել էին AstraZeneca պատվաստանյութը։ Այս դեպքերից հետո եվրոպական 11 երկիր, ինչպես նաև Թաիլանդը ժամանակավորապես դադարեցրել էին պատվաստումները տվյալ ընկերության պատվաստանյութով։