Էկոնոմիկայի նախարարն Արարատի մարզում հետևել է խաղողի մթերմանն ու քննարկել առկա խնդիրները

ՀՀ էկոնոմիկայի նախարար Վահան Քերոբյանն ու նախարարի տեղակալ Արման Խոջոյանը սեպտեմբերի 10-ին այցելել են Արմավիրի մարզ՝ խաղողի մթերումների ընթացքին հետևելու և առկա խնդիրները քննարկելու նպատակով: Այցի ընթացքում նրանց ուղեկցել է Արմավիրի մարզպետ Էդվարդ Հովհաննիսյանը։

Այս մասին այսօր տեղեկացնում է նախարարության ֆեյսբուքյան էջը։

Ամասիա, Սարդարապատ, Ակնալիճ և այլ հարակից համայնքներում խաղողագործներին մտահոգող հիմնական խնդիրներն էին խաղողի մթերման գինը, մթերման ծավալները և վճարման ժամկետները։

Պաշտոնյաներն այցելել են նաև «Պռոշյանի կոնյակի գործարան» ՍՊԸ, «Երևանի Արարատ կոնյակի-գինու-օղու կոմբինատ» ԲԲԸ-ի Նոր Ամասիայի խաղողի մթերման կայան և «ՄԱՊ» ՓԲԸ։ Ընկերությունների ղեկավարների հետ շրջայցի ընթացքում քննարկվել են խաղողի մթերումների կազմակերպմանը վերաբերող հարցեր։

Ընդհանուր առմամբ, Արմավիրի մարզում առկա է տեխնիկական խաղողի մոտ 4700 հա բերքատու այգի։ Կանխատեսվում է, որ այս տարի մարզում կարտադրվի մոտ 90-92 հազար տոննա խաղող։