Ամեն ինչ կարող է ավարտվել մինչև օրվա ավարտը. Պեսկովը նշել է` որ դեպքում

Ուկրաինայում ռազմական գործողությունները կարող են ավարտվել «մինչև օրվա վերջ», եթե Կիևը ազգայնականներին հրամայի վայր դնել զենքերը, ТАСС գործակալության փոխանցմամբ՝ այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։

«Ուկրաինական կողմը կարող է ամեն ինչ դադարեցնել մինչև ընթացիկ օրվա ավարտը, հարկավոր է հրաման, որ ազգայնական ստորաբաժանումները վայր դնեն զենքերը, հրաման, որ ուկրաինացի զինվորականները վայր դնեն զենքերը, և հարկավոր է կատարել Ռուսաստանի պայմանները։ Եվ ամեն ինչ կարող է ավարտվել մինչև օրվա վերջ», – այսպես է Պեսկովը մեկնաբանել Ուկրաինայի նախագահ Վլադիմիր Զելենսկիի այն հայտարարությունը, թե ինքը կցանկանար դադարեցնել ռազմական գործողությունները մինչև ցուրտ եղանակի սկսվելը։

Պեսկովը նաև նշել է, որ հատուկ ռազմական գործողությունն ընթանում է ըստ պլանի և հասնում է իր նպատակներին։

Ընդ որում, ՌԴ նախագահի մամուլի քարտուղարը բացասաբար է պատասխանել ՏԱՍՍ-ի ճշգրտող հարցին՝ արդյո՞ք ռուսական կողմը Ուկրաինայում հատուկ ռազմական գործողությունն ավարտելու մոտավոր ժամկետ ունի, թե ոչ։