Ինդոնեզիայի ամենաակտիվ գործող հրաբուխը շիկացած լավա է ժայթքել (լուսանկարներ)

Ինդոնեզիայի ամենաակտիվ գործող հրաբուխը՝ Մերապին, շիկացած լավա է ժայթքել, գրում է rawstory.com-ը։

Ինդոնեզիայի հրաբխագիտության և երկրաբանության կենտրոնը նշում է, որ Ճավա կղզու վրա գտնվող Մերապի լեռը վերջին երկու օրերի ընթացքում գրեթե երկու տասնյակ անգամ լավա է ժայթքել։

Ինդոնեզական իշխանություններն արգելել են խառնարանին մոտենալ: Տեղի փրկարար ծառայությունները բարձր պատրաստության մակարդակի են բերվել:

2968 մետր բարձրությամբ հրաբուխը գտնվում է Ճավա կղզու վրա՝  Ջոկակարտա քաղաքից ոչ հեռու, իսկ մայրաքաղաք Ջակարտայից՝ 520 կմ հեռավորության վրա։ Խոշոր ժայթքումները դիտվում են 7 տարին մեկ անգամ, իսկ փոքրերը՝ տարվա մեջ մոտ երկու անգամ: Հրաբուխը ծխում է գրեթե ամեն օր:

Մերապիի 2010 թվականի ժայթքման ժամանակ տարհանել են 350 000 մարդ, սակայն նրանցից ոմանք վերադարձել են՝ ընկնելով պիրոկլաստիկ հոսքի մեջ, որի հետևանքով մահացել է 353 մարդ։