Ֆրանսիայի ԱԳՆ հայտարարությունը Տեղի սահմանային գոտում իրականացված ադրբեջանական հարձակման վերաբերյալ

Ֆրանսիայի ԱԳՆ-մ հայտարարություն է տարածել Տեղում երեկ՝ ապրիլի 11-ին, տեղի ունեցած ադրբեջանական հարձակման վերաբերյալ:

«Ֆրանսիան իր խորը մտահոգությունն է հայտնում ապրիլի 11-ին Հայաստանի և Ադրբեջանի սահմանին, հայկական տարածքում Տեղ բնակավայրի մոտ տեղի ունեցած բռնության կապակցությամբ, որի հետևանքով երկու կողմից 7 զոհ և մի քանի վիրավոր կա։

Այն հիշեցնում է, որ սահմանի սահմանազատումը պետք է իրականացվի բացառապես բանակցությունների միջոցով և կողմերին կոչ է անում շարունակել ջանքերն այդ ուղղությամբ։ Հայաստանի տարածքային ամբողջականության նկատմամբ հարգանքը և շփման գծի հայկական կողմի օկուպացված դիրքերից ադրբեջանական ուժերի դուրսբերումը էական նշանակություն ունեն ապագա միջադեպերը կանխելու և տարածաշրջանում կայուն խաղաղության հիմքերը պահպանելու համար։

Ֆրանսիան լիովին աջակցում է սահմանի հայկական կողմում տեղակայված ԵԱՀԿ դիտորդական առաքելության գործողություններին, որին նա աջակցում է և որը կենտրոնական դեր է խաղում լարվածությունը նվազեցնելու գործում։ Այն կշարունակի աշխատել ի նպաստ հրադադարի, երկխոսության և Հայաստանի և Ադրբեջանի միջև բանակցությունների շարունակման», -ասված է Ֆրանսիայի ԱԳՆ հայտարարության մեջ:

Ապրիլի 11-ին՝ ժամը 16:00-ի սահմաններում, Ադրբեջանի ԶՈՒ ստորաբաժանումները կրակ էին բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈՒ զինծառայողների ուղղությամբ:

Ադրբեջանական սադրանքի հետևանքով հայկական կողմն ունի 4 զոհ, 6 վիրավոր: Ադրբեջանական կողմն ունի 8 զոհ և 10 վիրավոր: