Ռուսական հետախուզությունը գիտեր Ղազախստանում անկարգությունների նախապատրաստման մասին․ Նարիշկին

Ռուսաստանի արտաքին հետախուզության  ծառայությունը  տեղեկություններ ուներ հունվարի սկզբին Ղազախստանում սկսված անկարգությունների նախապատրաստման մասին, «Московский Комсомолец»-ին տված հարցազրույցում ասել է Արտաքին հետախուզության ծառայության տնօրեն Սերգեյ Նարիշկինը։

«Իհարկե եղել են։ Նախ այն մասին, որ Սիրիայում ջախջախված Իսլամական պետության  և այլ ահաբեկչական խմբավորումների զինյալները հասել են Կենտրոնական Ասիայիշրջաններ։ Դա գաղտնիք չէր ո՛չ մեզ համար, ո՛չ էլ այս պետությունների հատուկ ծառայությունների համար։ Հայտնի էր նաև, թե ում հովանավորությամբ է տեղի ունեցել նրանց տեղափոխումը»,- ասել է Նարիշկինը։

Նա նշել է, որ այս կապակցությամբ մտահոգություն են հայտնել տարածաշրջանի բոլոր պետությունները։ Ռուսական հետախուզությունը անկարգությունների նախապատրաստման մասին տեղեկությունները փոխանցել է Ղազախստանի և ՀԱՊԿ անդամ այլ երկրների գործընկերներին։

Այսօր, ավելի վաղ, ՌԴ նախագահ Վլադիմիր Պուտինը հայտարարել էր, որ Ղազախստանը դարձել է միջազգային ավազակախմբերի զոհը, որոնք օգտվել են երկրում ստեղծված բարդ իրավիճակից։

Հիշեցնենք, հունվարի 2-ին Ղազախստանի արևմտյան հատվածում զանգվածային բողոքի ցույցեր էին  սկսվել  հեղուկ գազի գնի կտրուկ բարձրացման պատճառով։ Հետագա օրերին ցույցերը վերածվեցին  անկարգությունների և  տարածվեցին նաև երկրի այլ շրջաններում։ Իրավիճակը հատկապես ծանր էր Ալմաթիում, որտեղ ցուցարարները հարձակվեցին ոստիկանների և զինվորականների վրա,կողոպուտի և հարձակման ենթարկեցին մի շարք վարչական շենքեր, առևտրի կենտրոններ, խանութներ և բանկեր և կարճ ժամանակով գրավեցին օդանավակայանի շենքը։

Երկրի նախագահ Կասիմ-Ժոմարտ Տոկաևը ցուցարարներին անվանել էր ահաբեկիչներ և հայտարարել հեղաշրջման փորձի մասին։