ՆԳՆ փրկարար ծառայությունը հատուկ մարտավարական ուսումնավարժություն անցկացրել Երևանի թիվ 38 հիմնական դպրոցում
Երևանի Վ. Բելինսկու անվան թիվ 38 հիմնական դպրոցում անցկացվել է «Անձնակազմի և աշակերտների տարհանման կազմակերպումը երկրաշարժի ժամանակ» թեմայով հատուկ մարտավարական ուսումնավարժություն:
Ինչպես տեղեկացրին ՀՀ ներքին գործերի նախարարության փրկարար ծառայությունից, ուսումնավարժության նպատակն էր ստուգել երկրաշարժի ժամանակ կազմավորումների անձնակազմի գործողություններին առնչվող գիտելիքները, ուսումնասիրել և կատարելագործել կազմավորումների գործնական ունակությունները, բարձրացնել պատրաստվածության մակարդակը երկրաշարժի դեպքում:
«Ուսումնավարժությանը ներգրավված էին «Երևանի Վ. Բելինսկու անվան թիվ 38 հիմնական դպրոց» ՊՈԱԿ-ի ղեկավար կազմը, փրկարարական, հակահրդեհային, կապի և ազդարարման, առաջին օգնության ցուցաբերման, հասարակական կարգի պահպանման կազմավորումները և տարհանման խումբը:
Հատուկ տակտիկական ուսումնավարժությունն անցկացվեց 1 փուլով, որի ընթացքում ակտիվ մասնակցություն ունեցան բոլոր կազմավորումները»,- ասվում է հաղորդագրության մեջ:
Ըստ աղբյուրի՝ կազմավորումները և անձնակազմը երկրաշարժի ժամանակ արագ են կողմնորոշվել և տարհանվել անվտանգ տարածք:
Նշվում է, որ փրկարարական կազմավորումը շենքից դուրս է բերել պայմանական տուժածներին և հանձնել առաջին օգնության կազմավորմանը: Հակահրդեհային կազմավորումը իրականացրել է հրդեհաշիջում: Իրականացվել է ակտիվ փոխհամագործակցություն։
«Հասարակական կարգի պահպանման գործողություններում նկատվեցին թերություններ, որոնց շտկման ուղղությամբ տրվեցին մի շարք հանձնարարականներ»,- հայտնում են ՀՀ ՆԳՆ փրկարար ծառայությունից՝ հավելելով, որ, ընդհանուր առմամբ, հատուկ մարտավարական ուսումնավարժությունը գնահատվել է «լավ»:
Կարծիքներ