Սոցիալական հեռավորությունը ջրում. ինչպե՞ս են աշխատում Երեւանի լողավազանները. News.am

Չնայած շարունակվող կորոնավիրուսի պանդեմիային, սահմանափակումներին, դիմակ կրելու պահանջներին՝ նույնիսկ փողոցում, երբ այլ անցորդներ չկան, Հայաստանում պարետատան թույլտվությամբ բաց եւ փակ լողավազանները գործում են առանց հատուկ սահմանափակումների:

Այս թեմայի շուրջ NEWS.am-ը զրուցել է մի քանի լողավազանների ներկայացուցիչների հետ:

Հարցումը ցույց է տվել, որ լողավազաններ այցելելու համար բժշկից թուղթ պետք չէ, լողավազաններում պարտադիր բժշկական զննություն են անցնում եւ հետեւում են սոցիալական հեռավորության պահանջին:

«Multi Wellness Center»-ում փակ լողավազանն աշխատում է այսօրվանից: Հաշվի առնելով այն, որ այստեղ լողավազանը մեծ է, այցելուների թվի սահմանափակումը սկսվում է մի քանի տասնյակից: Նման պատկեր է նաեւ «Grand sport»-ում: 

Դավիթ Համբարձումյանի անվան մանկապատանեկան մարզադպրոցում հայտնեցին, որ մեծահասակների համար ժամերը առանձին են, կարող է այցելել 5-6 մարդ: Այստեղ սահմանափակումները տարածվում են հանդերձարանների վրա, որտեղ կարող է միանգամից գտնվել 5 հոգուց ոչ ավելի:

«Նեպտուն» համալիրում էլ հայտնեցին, որ հատուկ սահմանափակումներ չկան, քանի որ այցելուները շատ չեն:

Գործում են նաեւ հյուրանոցների լողավազանները: Այստեղ բժշկից թուղթ չեն ուզում, սակայն չափում են ջերմությունը, գործում են նաեւ այցելուների թվի խիստ սահմանափակումներ: «Կոնգրես» հյուրանոցի լողավազանում կարող են միանգամից գտնվել մինչեւ 6 մարդ, «Գրանդ հոթել»-ում՝ միայն 5 մարդ: