Ակնհայտ է, որ մասնակցության ցուցանիշը 2018-ին չի հասնի, բայց ես հույս ունեմ, որ մարդիկ կգնան տեղամասեր. Դավիթ Խաժակյան
3/32 ընտրատեղամասում իր քաղաքացիական պարտքը կատարեց դստեր հետ ընտրության եկած «Լուսավոր Հայաստան» կուսակցության քաղաքապետի թեկնածու Դավիթ Խաժակյանը:
Ընտրատեղամասի բակում արդեն մինչ Խաժակյանը կպատասխաներ լրագրողների հարցերին, դուստրը սկսեց երգել՝ «Երևան դարձած իմ Էրեբունի»:
Խաժակյանը ձայնակցեց փոքրիկ Նանեին ու կատակեց՝ «Ես չեմ սովորեցրել, որ երգեր հիմա»:
Այնուհետ Խաժակյանը պատասխանեց՝ հանուն ինչպիսի Երևանի քվեարկեցիք, հարցին:
«Քվեարկեցի հանուն եվրոպական մոդելի Երևանի, հանուն զարգացող և հարմարավետ քաղաքի, հանուն աշխատող քաղաքապետարանի: Շատ բանի անհրաժեշտություն ունենք և հույս ունեմ, որ մեր քվեարկությունն իր նպատակին կծառայի»,- ասաց Խաժակյանը:
Ըստ Խաժակյանի, Երևանի քաղաքապետըարանի վարչություններում ընթացակարգային լուրջ փոփոխությունների կարիք կա, որովհետև բյուրոկրատիան չափազանց ծանր է և մեխանիզմները պետք է թեթևացնել:
«Հաստիքացուցակի էական վերանայումներ ունենք, և քաղաքապետարանը պետք է լինի այնքան հասանելի, որ մարդիկ չզանգեն ինձ՝ ասեն, «ձեզ ընկանք, բայց թեժ գծին չընկանք»»:
Խաժակյանը նաև նշեց, որ մինչ այս պահն ունեցած թվային տվյալների համեմատությամբ կարող է ասել, որ կա մասնակցության ցածր ցուցանիշ:
«Թվերը գալիս են, համեմատական ցուցանիշով կարող ենք ասել, որ մասնակցության ընթացքը ցածր է: Ակնհայտ է, որ այն 2018-ի մասնակցությանը չի հասնի, բայց ես հույս ունեմ, որ մարդիկ կմասնակցեն, որովհետև Երևանի հետագա 5 տարվա կառավարումը կախված է այսօրվանից»,- ասաց Խաժակյանը:
Կարծիքներ