Նեթանյահուի որդին հայտարարել է, որ Իսրայելի վարչապետին «զվարճացնում» են իր դեմ ուղղված զանգվածային բողոքի ակցիաները

Իսրայելի վարչապետ Բենիամին Նեթանյահուի որդին` Յաիր Նեթանյահուն, Galei Israel Radio ռադիոկայանի հետ զրույցում հայտարարել է, որ իր հայրը ծիծաղում է իր դեմ հանդես եկող «այլմոլորակայինների» լուսանկարների վրա, գրում է haaretz.com կայքը:

«Ես երբեմն նրան ցույց եմ տալիս մի քանի ընտրված տեսանյութեր, աշխատում եմ շատ կոպիտ բաներ ցույց չտալ, որովհետև ամեն դեպքում հաճելի չէ: Դա զվարճացնում է նրան և նույնիսկ մի քիչ ուժ է տալիս»,-ասել է Յաիրը:

Նեթանյահու կրտսերը, որը պաշտոն չունի, հայտնի է դարձել սոցիալական ցանցերում իր ոչ միանշանակ մեկնաբանություններով:

Թվիթերում Յաիրը փորձել է հստակեցնել իր դիտողությունները` հայտարարելով, որ այն ցուցարարները, որոնց ինքը նկատի ուներ ռադիոկայանի հետ զրույցում, զվարճալի կոստյումներով են եղել:

«Ես նկատի ունեի նրանց, ովքեր հագնվել էին ինչպես այլմոլորակայիններ և սեռական օրգաններ, նրանց, ովքեր կոպիտ գրառումներով պաստառներ էին պարզել, սպագետիի ափսեներ էին դրել գլխին կամ հագնվել էին ինչպես Սարդ-մարդը: Նրանք այնքան շատ են, և դա ծիծաղելի է»,-գրել է Նեթանյահու կրտսերը:

Վարչապետի որդին նշել է, որ արդեն ծիծաղելի չէ այն, որ ԶԼՄ-ների աջակցությամբ անարխիստական ցույցերի ժամանակ «աճում է բացահայտ սպանության կոչերի թիվը»:

Ի պատասխան Նեթանյահուի որդու խոսքերին՝ «Սև դրոշ» շարժումը, որը հակակառավարական ցույցերի կազմակերպիչներից է, հայտարարել է.«Միլիոնավոր գործազուրկներ ծիծաղեցնում են նրան, համաճարակից մահացող քաղաքացիները զվարճացնում են»:

Հղում անելով վարչապետի նկատմամբ քրեական գործերին՝ հայտարարության մեջ ավելացվել է. «Մեղադրյալի ընտանիքի համար մենք նույնիսկ մարդ չենք: Սա վարչապետ չէ: Սա մեղադրյալ է, որի համար իր ժողովրդի տառապանքները զվարճալի են: Ցույցերը շարունակվելու են, մինչև նա հրաժարական տա»:

Ցուցարարները բողոքում են կորոնավիրուսի բռնկմանը երկրի կառավարության արձագանքի և դրան հաջորդած տնտեսական ճգնաժամի համար, ինչի հետևանքով շատ իսրայելցիներ գործազուրկ են դարձել, ինչպես նաև պահանջում են 3 կոռուպցիոն գործերով մեղադրվող Բենիամին Նեթանյահուի հրաժարականը:

Ինչպես ավելի վաղ տեղեկացրել էր Tert.am-ը, Իսրայելի վարչապետ Բենիամին Նեթանյահուին կդատեն կոռուպցիայի մեղադրանքով:

Ինքը` Նեթանյահուն, բոլոր մեղադրանքները ժխտում է, ինչպես նաև մերժում է հակառակորդների` հրաժարական տալու առաջարկը: Նա մեղադրանքները բնորոշում է որպես «վհուկների որս»` կազմակերպված քաղաքական հակառակորդների կողմից: