Կարմիր խաչի գործունեության ավարտն Ադրբեջանում է՛լ ավելի է բարդացրել իրավիճակը. Միրզոյանը՝ Բաքվում պահվող հայերի մասին
ՀՀ արտաքին գործերի նախարար Արարատ Միրզոյանը հայտարարել է, որ Բաքվում դեռևս կան պահվող հայ գերիներ, որոնք պետք է անհապաղ ազատ արձակվեն։
Այս մասին նա նշել է Էստոնիայի ԱԳ նախարար Մարգուս Ցահքնայի հետ համատեղ ասուլիսի ընթացքում՝ անդրադառնալով հայ-ադրբեջանական հարաբերություններին և չլուծված հումանիտար խնդիրներին։
«Մեր դիրքորոշումը չի փոխվել․ այդ մարդիկ պետք է հնարավորինս շուտ ազատ արձակվեն։ Մենք համոզված ենք, որ նրանց վերադարձը կնպաստի խաղաղության ամրապնդմանը։ Սա մեր օրակարգի առաջնահերթ հարցերից է, և մենք շարունակաբար քննարկում ենք այն նաև միջազգային գործընկերների հետ»,- ասել է Միրզոյանը։
Անդրադառնալով հարցին, թե կա՞ն արդյոք նոր զարգացումներ, նախարարն ընդգծել է, որ իրավիճակը ավելի է բարդացել Կարմիր խաչի գործունեության դադարեցումից հետո։
«Այո, Կարմիր խաչի գործունեության ավարտը Ադրբեջանում լրացուցիչ դժվարություններ է ստեղծել։ Նորություն այս պահին չկա։ Այս հարցում միակ իրական նորությունը կարող է լինել գերիների նոր խմբի ազատ արձակումը»,- նշել է նա։
Կարծիքներ