Դիարբեքիրի փաստաբանների պալատի դեմ հետաքննութուն է սկսվել` Ցեղասպանւթյան մասին հրապարակման համար
Դիարբեքիրի հանրապետական գլխավոր դատախազությունը, Հայոց ցեղասպանության 106-րդ տարելիցի կապակցությամբ հայտարարություն անելու համար, հետաքննություն է սկսել Դիարբեքիրի փաստաբանական պալատի դեմ, հայտնում է Ermenihaber-ը։
Պալատի նախագահի և խորհրդի անդամների դեմ մեղադրանք է առաջադրվել Թուրքիայի քրեական օրենսգրքի՝ «թուրք ժողովրդին, Թուրքիայի Հանրապետությանը, պետական հաստատություններին և օրգաններին նսեմացնելու» մասին համապատասխան հոդվածի հատկանիշներով:
Նշենք, որ Դիարբեքիրի փաստաբանական պալատի թվիթերյան էջում գրառում էր հրապարակվել, որին կից տեղադրվել էր ամբողջական հայտարարության հղումը։
«Կիսում ենք Մեծ աղետի ցավը: Մենք որևէ տեղ չենք կարող հասնել՝ պատմության խավարից խուսափելով: Հայերի ներկայացրած ճշմարտությունը անցյալի հետ առերեսվելու ամենակենսական հանգույցներից մեկն է»,- նշված է գրառման մեջ:
Հայտարարության տեքստում անդրադարձ է կատարվել 1915թ. ապրիլի 24-ին հայ մտավորականների ձերբակալությանը և նրանց «անհայտ ճակատագրերին», ներկայացվել վերջին տարիներին նույնաբովանդակ հրապարակումների համար պալատի դեմ առաջադրված մեղադրանքները և թուրքական իշխանություններին և հասարակությանը կոչ արվել առերեսվել հայերի ճշմարտության հետ:
Կարծիքներ