Սա բոլորիս հաղթանակն է. Լևոն Արոնյանի ընկերուհու գրառումը գրոսմայստերի հաղթանակի առթիվ

Լևոն Արոնյանի ընկերուհի Անիտա Այվազյանը, գրոսմայստերի՝ արագ շախմատի Goldmoney Asian Rapid օնլայն մրցաշարի հաղթողի կոչումը նվաճելուց հետո գրառում է կատարել ֆեյսբուքյան էջում:

«Սիրելինե՛րս, hիշու՞մ եք՝ խոստացել էի լավ լուրեր բերել: Օրեր շարունակ լինելով մրցաշարի առաջնատարը և գրանցելով մի շարք հաղթանակներ՝ Լևոնս դարձավ Goldmoney Asian Rapid մրցաշարի հաղթողը: Անկեղծ ասած, անչափ հուզված եմ ու ուզում եմ մեկ առ մեկ գրկել նրանց, ովքեր հետևում էին, ուժ էին տալիս ու դրական էներգիա ուղարկում մեզ: Սա բոլորիս հաղթանակն է: Ի դեպ, այսօր նաև Լևոնի հայրիկի ծննդյան օրն է, ու Լևոնը նրան հրաշալի նվեր արեց: Եվս մեկ անգամ շնորհակալ եմ ձեզ, որ մեր կողքին եք»,- գրել է Անիտա Այվազյանը:

Հիշեցնենք, որ եզրափակչի 2 խաղային օրերի արդյունքում Արոնյանը հաղթեց ռուսաստանցի Վլադիսլավ Արտեմիևին, իսկ մինչ այդ կիսաեզրափակչում հաղթել էր աշխարհի չեմպիոն Մագնուս Կարլսենին: