Վաշինգտոնը Անկարային կոչ է անում հրաժարվել Ռուսաստանից զենքի ու ռազմական տեխնիկայի հետագա գնումներից

Վաշինգտոնը Անկարային եւ նրա այլ օտարերկրյա դաշնակիցներին եւ գործընկերներին կոչ է անում հրաժարվել Ռուսաստանից զենքի եւ ռազմական տեխնիկայի հետագա գնումներից: Այս մասին արտասահմանցի լրագրողների հետ առցանց հանդիպման ժամանակ ասել է ԱՄՆ պետքարտուղար Էնթոնի Բլինքենը՝ մեկնաբանելով Թուրքիայի կողմից ռուսական С-400 զենիթահրթիռային համակարգերի (SAM) գնման հետ կապված իրավիճակը, հայտնում է ՏԱՍՍ-ը:

Նա հույս է հայտնել, որ ԱՄՆ-ն ու Թուրքիան կկարողանան առաջ շարժվել այս հարցում: «Այնուամենայնիվ, ապագայի համար շատ կարեւոր է, որ Թուրքիան եւ, այդ հարցում [ԱՄՆ-ի] բոլոր դաշնակիցներն ու գործընկերները խուսափեն ռուսական զենքի հետագա ձեռքբերումներից, ներառյալ լրացուցիչ С-400 համակարգերը, ինչը Ռուսաստանին տալիս է եկամուտներ, հասանելիություն եւ ազդեցություն: Կրկին՝ Ռուսաստանի պաշտպանական կազմակերպությունների հետ ցանկացած նշանակալի գործարք կարող է ենթակա լինել օրենքին՝ CAATSA-ին: Եւ սա առանձին է, ի լրումն արդեն կիրառված պատժամիջոցների»,- ասել է նա:

Բլինքենը նշել է, որ Վաշինգտոնը հստակ շարադրում է իր տեսակետները Անկարային С-400 հակաօդային պաշտպանության համակարգը գնելու շուրջ ստեղծված իրավիճակի վերաբերյալ: Չնայած այս ամենին՝ ԱՄՆ-ը ձգտելու է պահպանել անվտանգության ոլորտում կապը Թուրքիայի հետ: «Բայց մենք կշարունակենք համագործակցել Թուրքիայի հետ ընդհանուր առաջնահերթությունների շուրջ, երկխոսություն վարել այն ոլորտների վերաբերյալ, որտեղ տարաձայնություններ կան»,- ասել է Բլինքենը:

Նրա խոսքով՝ Թուրքիայի կողմից С-400 հակաօդային պաշտպանության համակարգ գնելը ուղղակիորեն հակասում է 2016-ին Վարշավայում կայացած գագաթաժողովում ՆԱՏՕ-ի անդամ երկրների ստանձնած պարտավորություններին: «Այն ժամանակ մասնակիցները պայմանավորվել էին կրճատել, այլ ոչ թե ընդլայնել կախվածությունը ռուսական տեխնիկայից»,- հիշեցրել է պետքարտուղարը: «С-400-ի ձեռքբերումը սպառնալիքի տակ է դնում Միացյալ Նահանգների անվտանգությունը, ինչպես նաեւ դաշնակիցների ռազմական տեխնոլոգիաները, խարխլում է ՆԱՏՕ-ի ամբողջականությունը, որի ուժեղ անդամներից են եւ՛ Թուրքիան, եւ՛ ԱՄՆ-ը, դաշինքում փոխգործունակությունը, ինչը կարեւոր է դրա արդյունավետ գործունեության եւ ցանկացած հնարավոր մարտահրավերներին արձագանքելու համար: Այն նաեւ զգալի ֆինանսական ռեսուրսներ է տրամադրում Ռուսաստանի պաշտպանական հատվածին, Ռուսաստանին տրամադրում է հասանելիություն Թուրքիայի զինված ուժերին, թուրքական պաշտպանական արդյունաբերությանը»։

Բլինքենը մերժել է իրավիճակը կարգավորելու հնարավորությունը նույն կերպ, ինչպես նախկինում ՆԱՏՕ-ի մեկ այլ անդամի` Հունաստանի դեպքում է եղել, երբ նա ցանկանում էր Ռուսաստանից С-300 հակաօդային պաշտպանության համակարգ ձեռք բերել: «Սրանք շատ տարբեր իրավիճակներ են, շատ տարբեր օրինակներ»,- համոզված է ամերիկյան դիվանագիտության ղեկավարը: Նա բացատրել է, որ որոշ նման գործարքներ կնքվել են Ռուսաստանի հետ դեռեւս ԱՄՆ-ում CAATSA-ի ուժի մեջ մտնելուց առաջ, եւ, հետեւաբար, չեն կարող համարվել Անկարայի կողմից С-400-ի գնմանը նույնական: «Այն մտահոգությունները, որոնք վճռականորեն ասվում են (Թուրքիային)՝ եւ՛ մեր վարչակազմի, եւ՛ [ԱՄՆ] Կոնգրեսի, դեմոկրատների եւ հանրապետականների կողմից, պարզ են, մնում են պարզ եւ չեն փոխվի»,- հավելել է Բլինքենը: