ԱՄՆ-ն Իրանի նկատմամբ պատժամիջոցները կարող է մեղմացնել միայն բանակցությունների մեկնարկից հետո
Ամերիկյան նոր վարչակազմը պատրաստ է քննարկել Իրանի դեմ պատժամիջոցների մեղմացման հարցը միայն Թեհրանի միջուկային խնդրի շուրջ բանակցությունների մեկնարկից հետո, հաղորդում է ՏԱՍՍ-ը` վկայակոչելով Axios-ը:
«[Ջո] Բայդենի վարչակազմը պատրաստ է քննարկել Իրանի դեմ պատժամիջոցների մեղմացման հնարավորությունը միայն կողմերի միջեւ բանակցությունների վերսկսումից հետո եւ միայն փոխադարձ գործընթացի շրջանակներում»,- նշում է պորտալը` վկայակոչելով աղբյուրները Պետդեպարտամենտում:
ԱՄՆ նախկին նախագահ Դոնալդ Թրամփը 2018-ին որոշում էր կայացրել հրաժարվել Իրանի հետ գործողությունների համատեղ համապարփակ ծրագրից (ԳՀՀԾ): Այս համաձայնագիրն Իրանի հետ ստորագրվել էր ՄԱԿ-ի Անվտանգության խորհրդի հինգ մշտական անդամների եւ Գերմանիայի կողմից 2015-ին` նպատակ ունենալով լուծել Թեհրանի միջուկային զարգացման ճգնաժամը: Ամերիկայի ներկայիս ղեկավար Ջո Բայդենը բազմիցս ազդարարել է Միացյալ Նահանգները ԳՀՀԾ վերադարձնելու պատրաստակամության մասին: Այնուամենայնիվ, ամերիկյան կառավարությունը դեռ գրեթե որեւէ նշանակալի քայլ չի արել այդ ուղղությամբ:
Իրանի նախագահ Հասան Ռոհանին մարտի 2-ին իր ֆրանսիացի գործընկեր Էմանուել Մակրոնի հետ հեռախոսազրույցում նախազգուշացրել էր, որ ԳՀՀԾ-ն չի քննարկման ենթակա չէ եւ այն պահպանելու միակ միջոցը Վաշինգտոնի կողմից Թեհրանի նկատմամբ պատժամիջոցների վերացումն է: Մինչդեռ Սպիտակ տան մամուլի քարտուղար Ջեն Փսակին ավելի վաղ հայտարարել էր, որ ԱՄՆ-ն բաց է Իրանի հետ դիվանագիտական երկխոսության համար, սակայն մտադիր չէ մեղմացնել Թեհրանի նկատմամբ սահմանված միակողմանի պատժամիջոցները:
Կարծիքներ