Սլովակիան ԵՀ-ին կոչ է արել միջամտել Ուկրաինայի կողմից նավթի տարանցումը դադարեցնելու հարցով
![Սլովակիան ԵՀ-ին կոչ է արել միջամտել Ուկրաինայի կողմից նավթի տարանցումը դադարեցնելու հարցով](https://freenews.am/uploads/images/image_750x_66a34a729bfa9.jpg)
Սլովակիան Եվրահանձնաժողովին (ԵՀ) կոչ է արել արագ որոշում կայացնել միջնորդության վերաբերյալ այն բանից հետո, երբ Ուկրաինան դադարեցրել է ռուսական նավթի տարանցումն իր տարածքով։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
ԵՀ-ի միջնորդության համար դիմումը ներկայացրել էին Սլովակիան և Հունգարիան. անցյալ շաբաթվանից նրանք դադարել են Ուկրաինայից ստանալ Ռուսաստանի «Լուկօյլ» ընկերության նավթը, քանի որ ընկերությունը հայտնվել է Կիևի պատժամիջոցների ցանկում։
ԵՀ-ն իր հերթին լրացուցիչ տեղեկատվություն է խնդրել ծագած խնդրի վերլուծության համար։
«Ես Եվրոպական հանձնաժողովին կոչ եմ անում ժամանակ չձգել և կանգնել իր անդամ երկրների և իր քաղաքացիների կողքին հնարավորինս շուտ.... Մենք ժամանակ չունենք, որովհետև մեր հարևան երկրի չմտածված պատժամիջոցներն ու անպատասխանատու գործողությունները կարող են շատ արագ բացասական հետևանքներ առաջացնել Սլովակիայի համար»,- Reuters-ի գրավոր հարցմանն ի պատասխան հայտնել է Սլովակիայի արտգործնախարար Յուրայ Բլանարը։
Նա կրկնել է, որ Սլովակիան այս վեճում դարձել է «պատանդ» Ուկրաինայի և Եվրոպական հանձնաժողովի ձեռքում։
Սլովակիան, ըստ Reuters-ի, քննադատել է Ուկրաինայում ռազմական գործողություններից հետո Ռուսաստանի դեմ սահմանված պատժամիջոցները՝ նշելով, որ դրանք Եվրամիությանն ավելի են վնասում, քան Ռուսաստանին։
Իր հերթին Հունգարիայի արտգործնախարար Պետեր Սիյարտոն հուլիսի 22-ին հայտարարել էր, որ Եվրահանձնաժողովը երեք օր ունի Բուդապեշտի և Բրատիսլավայի՝ խորհրդակցություններ սկսելու մասին դիմումին պատասխանելու համար, որից հետո երկու երկրները կդիմեն դատարան։
2022 թվականին ԵՄ-ն պատժամիջոցներ է սահմանել ռուսական նավթի ներկրման դեմ, սակայն Սլովակիան, Հունգարիան և Չեխիան արտոնություններ են ստացել՝ ռուսական նավթից իրենց կախվածության պատճառով։
Ռուսաստանի Դաշնությունից այդ երկրներ էներգակիրների մատակարարումներն իրականացվում են «Դրուժբա» խողովակաշարով, որն անցնում է Ուկրաինայի տարածքով:
Published by Armenpress, original at https://armenpress.am/hy/article/1196451
Կարծիքներ