Գերմանիայում բոլոր ատոմակայանների փակումն անվանել են ճիշտ քայլ

Գերմանիայի էկոնոմիկայի նախարար և փոխկանցլեր Ռոբերտ Հաբեկն ասել է, որ էներգետիկ ճգնաժամի գագաթնակետին մնացած ատոմակայանների փակումը ճիշտ քայլ էր, քանի որ դրանց պահպանումը չի օգնի ազատվել Ռուսաստանի էներգիայից, որն ուրանի հիմնական մատակարարն է։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։ 

«Այն փաստարկը, որ միջուկային էներգիան մեզ կպաշտպանի Ռուսաստանի կախվածությունից, ցավոք, ճիշտ չէ»,- ասել է Հաբեկը։

Փոխկանցլերը նաև ընդգծել է ԵՄ-ի և ԱՄՆ-ի կողմից ռուսական ուրանի գնումն արգելող պատժամիջոցների փաթեթ ընդունելու անհրաժեշտությունը։

Կանաչների կուսակցության ներկայացուցիչները, որի անդամ է Հաբեկը, անցած տարի առաջ են քաշել վերջին ատոմակայանների փակումը էկոնոմիկայի և շրջակա միջավայրի նախարարությունների միջոցով՝ հակառակ փորձագիտական ​​կարծիքի, և երբեմն էլ նույնիսկ տեղեկատվության խեղաթյուրման միջոցով:

2011 թվականին Գերմանիայի կառավարությունը՝ այն ժամանակվա կանցլեր Անգելա Մերկելի գլխավորությամբ, որոշում կայացրեց մինչև 2022 թվականն ամբողջությամբ դադարեցնել միջուկային էներգիայի արտադրությունը։ Այդ որոշման վերջնական փաստարկը ճապոնական «Ֆուկուսիմա» ատոմակայանում տեղի ունեցած վթարն էր։ Մինչև 2022 թվականը գործում էր ընդամենը երեք ատոմակայան՝ Իսար 2, Նեկարվեստհայմ 2 և Էմսլանդ։ Ռուսական գազից հրաժարվելու պատճառով դրանց շահագործումը երկարաձգվել է մինչև 2023 թվականի ապրիլի կեսերը, երբ դրանք լիովին դուրս կգան շահագործումից։