Ինչ սպառազինություն է Պենտագոնն ուղարկում Ուկրաինա
Միացյալ Նահանգները Ուկրաինային կտրամադրի ռազմական օգնության նոր փաթեթ՝ մոտ 150 միլիոն դոլար արժողությամբ, որը կներառի հակաօդային պաշտպանություն և հակատանկային զենքեր:
Այս մասին այսօր հայտարարել է ԱՄՆ պետքարտուղար Էնթոնի Բլինկենը։
«Միացյալ Նահանգներն այսօր հայտարարում է զենքի և տեխնիկայի նոր տրանշի մասին՝ օգնելու Ուկրաինային հաջողության հասնել մարտի դաշտում:
Զենքի և տեխնիկայի այս նոր փաթեթը ներառում է հակաօդային պաշտպանություն, հրետանի, հակատանկային և այլ զենքեր, որոնք էլ ավելի կբարձրացնեն Ուկրաինայի պաշտպանությունը ռուսական հարձակումից»,- ասել է Բլինկենը:
Խոսքը սպառազինությունների մատակարարման մասին է, որը Կիև կուղարկվի Պենտագոնի ռեզերվների հաշվին։
Ինչպես հավաստիացրել է պետքարտուղարը, Միացյալ Նահանգները և նրա դաշնակիցները մտադիր են շարունակել աջակցել Ուկրաինային, քանի դեռ Ռուսաստանի Դաշնությունը որոշում չի կայացնի դադարեցնել հատուկ գործողությունը և դուրս բերել իր զորքերը այն տարածքից, որն Արևմուտքն ուկրաինական է համարում։
«Մենք կշարունակենք աշխատել Կոնգրեսի հետ՝ օգնելու Ուկրաինային ապահովելու ապագա, որտեղ ժողովուրդը կապրի անվտանգ և կայուն, բարգավաճ ժողովրդավարության պայմաններում»,- ասել է ամերիկյան դիվանագիտության ղեկավարը:
Կարծիքներ