Վարդան Ղուկասյանի մասին իմ կարծիքը չի փոխվել. կարծում եմ՝ իր ճիշտ տեղը բանտն էր. Ալեն Սիմոնյան
«Տրամաբանական է, որ ուժը, որն ամենաշատը ձայներ է հավաքել, քաղաքապետ ընտրի, իսկ մնացած տարբերակները, չեմ կարծում, որ ժամանակի և իրականության մեջ աշխատող տարբերակներ են լինելու»:
Այս մասին ԱԺ-ում լրագրողների հետ ճեպազրույցում ասել է ՀՀ ԱԺ նախագահ Ալեն Սիմոնյանը՝ պատասխանելով Գյումրիում սպասվող ավագանու առաջին նիստի վերաբերյալ հարցերին:
«Մյուս տարբերակները բացասական ազդեցություն կունենան Գյումրու հետ կապված բարեփոխումների, աշխատանքների վրա, որովհետև նմանատիպ չակերտավոր մեկժամյա, մեկ գիշերվա կոալիցիան, չեմ կարծում, որ կկարողանա ապահովել բնականոն գործունեությունը: Սա իմ կարծիքն է»,- ասել է Սիմոնյանը:
Անդրադառնալով հարցին՝ արդյոք Վարդան Ղուկասյանը (Գյումրու նախկին քաղաքապետ) կկարողանա աշխատել Կառավարության հետ, Սիմոնյանը պատասխանել է, որ վերջինի մասին իր կարծիքը չի փոխվել:
«Ես կարծում եմ՝ իր ճիշտ տեղը բանտն էր»,- պարզաբանել է Սիմոնյանը:
Դիտարկմանը, թե ով է թերացել Ղուկասյանի՝ ազատության մեջ մնալու հարցում, ԱԺ նախագահը պատասխանել է.
«Բոլորս: Դե երևի ինչ-որ պահի ինչ-որ տեղ ամեն ինչ չէ, որ ճիշտ ենք արել, նաև կան հարուցված գործեր, և կարծում եմ՝ ժամանակի ընթացքում այդ հարուցված գործերն իրենց հանգրվանին կհասնեն»:
Կարծիքներ