Եղիշե Չարենցի տուն-թանգարանում նշվել է պոետի 126-ամյակը

Մարտի 13-ը հայ մեծանուն գրող Եղիշե Չարենցի ծննդյան օրն է. օրվա շրջանակում Եղիշե Չարենցի տուն-թանգարանում տեղի է ունեցել միջոցառում. ամփոփվել է գրողի հոբելյանական 125-ամյակը, բացվել են «Նվեր հոբելյանին. Չարենց 125» ժամանակավոր և «Այստեղ աշխատում է Չարենցը» հոլոգրաֆիկ ցուցադրությունները, հնչել են երաժշտական էլեկտրոնային կատարումներ (ethno electropop)՝ գրված չարենցյան տողերով, խորագիրը՝ «Մարտ 13. Մարինե Մանասյան»։

Միջոցառմանը ներկա էին ՀՀ-ում Իտալիայի Հանրապետության արտակարգ և լիազոր դեսպան Ալֆոնսո Դի Ռիզոն, ՀՀ-ում Նիդերլանդների Թագավորության արտակարգ և լիազոր դեսպան Նիկոլաս Յակոբ Սխերմերսին, ինչպես նաև մշակույթի գործիչներ, գրականագետներ, չարենցասերներ։

«Նրա ստեղծագործություններում տեսնում ենք մեր ժողովրդի անցյալի փառքերը, ներկայի մռայլ ու լուսավոր ծալքերը, նաև ապագայի երազները: Տեսնում ենք թե՛ ապրելու «հսկա տենչը», և թե՛ հանուն հայրենիքի սեփական անձի զոհաբերումը: Չարենցը ոտք դրեց մեր պատմության հեռավոր քառուղիների վրա, բայց հենց ներկայի հայացքով անդրադարձավ պատմությանը և գնահատեց այն: Համաշխարհային մտքի և արվեստի տիտանների հետ ամրապնդվեց Չարենցի ոգեկան հաղորդակցությունը՝ դուրս գալով հայոց պատմության սահմաններից և տարածվելով աշխարհով մեկ»,- ասված էր Եղիշե Չարենցի տուն-թանգարանի տնօրեն Ժաննա Մանուկյանի ելույթի խոսքում:

Ժաննա Մանուկյանը շնորհակալագրեր է հանձնել գործընկերներին՝ տարբեր կառույցների ներկայացուցիչների, Եղիշե Չարենցի ծննդյան 125-ամյակին նվիրված միջոցառումների շրջանակում Եղիշե Չարենցի տուն-թանգարանի հետ համագործակցության համար:

Ե. Չարենցի հոբելյանական տարին մեկնարկել էր դեռևս նախատոնին՝ խորհրդանշական Գրքի Երևանյան 4-րդ փառատոնով, որը կրել է «Ժամանակիդ շունչը դարձի՛ր» չարենցյան կարգախոսը:

Տարվա ընթացքում միջոցառումներ են իրականացվել Հայաստանի ազգային գրադարանում, ֆիլհարմոնիկում, Գրողների, Նկարիչների միություններում, Կոմիտասի, Թումանյանի թանգարաններում, Մ. Սարյանի, Պ. Սևակի տուն-թանգարաններում, «Արար» մարզային կենտրոններում, Օպերայի և բալետի ազգային թատրոնում, և նույնիսկ Հայաստանի սահմաններից դուրս՝ Իտալիայում, Գերմանիայում, Անգլիայում, Կանադայում, Ֆրանսիայում և այլուր։ միջոցառումների անմիջական մասնակիցներ են եղել Հայաստանի հանրային ռադիոն, տարբեր հեռուստաընկերություններ, Կինոյի և թատրոնի ինստիտուտը:

Կենտրոնական բանկի կողմից թողարկվել է «Չարենց 125» ոսկե հուշադրամը, «Հայփոստ» ընկերությունը ֆիլատելիստների հայկական ասոցացիայի հետ թողարկել է «Չարենց 125» նամականիշը: Տուն-թանգարանի, Չարենց ընտանիքի և քանդակագործ Արմենակ Վարդանյանի համատեղ ջանքերով վերականգնվել է բանաստեղծի հիշատակը հավերժացնող հուշաքարը։

Տարվա հիմնարար ձեռքբերում էր Չարենցի «Երկերի ժողովածուի» ակադեմիական հրատարակության աշխատանքների մեկնարկը՝ ՀՀ ԳԱԱ գրականության ինստիտուտի, Չարենցի տուն-թանգարանի և «Անտարես» հրատարակչության միջև փոխգործակցության հուշագրի հիման վրա: Տեղի է ունեցել «Չարենցը և իր ժամանակաշրջանը» գիտաժողովը: Տարին լի էր նաև բազմալեզու հրատարակություններով: