Հայաստանում մշակված արբանյակի թողարկումն ապացուցեց, որ մեր երկրում գիտությունն ապագա ունի․ Հակոբ Արշակյան
ԱԺ նախագահի տեղակալ Հակոբ Արշակյանն ու «Քաղաքացիական պայմանագիր» խմբակցության պատգամավոր Հակոբ Ասլանյանը հունիսի 7-ին ներկա են գտնվել Ինժեներական քաղաքի գիտության և տեխնիկայի թանգարանում կայացած Հայաստանի առաջին հայրենական արբանյակի՝ «Հայասաթ-1»-ին նվիրված ցուցադրության բացման հանդիսավոր արարողությանը:
Այս մասին հայտնում են ՀՀ ԱԺ հանրային կապերի բաժնից;
Ողջունելով ներկաներին՝ Հակոբ Արշակյանը նշել է, որ տարիներ առաջ, երբ փորձ էր արվում ոլորտը կանոնակարգել, և խորհրդարանը քննարկում էր «Տիեզերական գործունեության մասին» օրենքը, թերահավատություն կար, և շատերը հարցնում էին, թե Հայաստանն ինչ կապ ունի տիեզերքի հետ:
«Բայց մենք հավատում էինք, որ ունենալու ենք նոր նվաճումներ: Սկզբում իսպանացի գործընկերների հետ իրականացրած, հետո նաև Հայաստանում մշակված արբանյակի թողարկումը բոլոր թերահավատներին հիմք տվեց հավատալու, որ Հայաստանում գիտությունն ապագա ունի, և այդ ապագան միայն ջանքերի շնորհիվ է դառնում իրականություն»,- ասել է ԱԺ փոխնախագահը:
Հակոբ Արշակյանը հույս է հայտնել, որ Հայաստանում արտադրված բազմաթիվ այլ ցուցանմուշների եւս ականատես կլինենք:
«Կարծում եմ՝ դժվար է գերագնահատել այն ձեռքբերումները, որոնց հիմա հասել ենք: Հույս ունեմ, որ մենք ավելի շատ համակարգեր ներգրավող, ավելի մեծ մասշտաբի նախագծեր կունենանք: Պետությունն իր վարած քաղաքականությամբ, գիտությանը հատկացվող միջոցներով և ուշադրությամբ կանգնած է ձեր կողքին: Շնորհավորում եմ»,- եզրափակելով խոսքը՝ ասել է Հակոբ Արշակյանը:
«Հայասաթ-1» արբանյակը ստեղծվել է «Բազումք» տիեզերական հետազոտությունների լաբորատորիայի ու Գիտական նորարարության և կրթության կենտրոնի կողմից: Տիեզերք է դուրս բերվել 2023 թվականին:
Կարծիքներ