Իրանում կորոնավիրուսը տարածվում է ահագնացող տեմպերով. կանխատեսվում է իրավիճակի առավել վատթարացում

Իրանում կորոնավիրուսով հիվանդների թիվը, համավարակի բռնկումից մինչ օրս աճել է մինչեւ 293.606 դեպք: Այս մասին երկուշաբթի հրավիրված մամուլի ասուլիսի ժամանակ հայտարարել է երկրի առողջապահության  եւ բժշկական կրթության նախարարության մամուլի քարտուղար Սիմա Սադաթ Լարին:

«Կորոնավիրուսի բռնկումից մինչ այսօր կորոնավիրուսով վարակվածներից 255.14-ը բուժվել եւ առողջացումով դուրս են գրվել»,-ասել է պաշտոնյան՝ հավելելով, որ ընդհանուր առմամբ Իրանում կորոնավիրուսից մահացել է 15.912 մարդ:

Այսքանը՝ պաշտոնական վիճակագրությամբ: իսկ ընդհանուր առմամբ, վերջին 1 ամսում ծայրահեղ վատթարացել է կորոնավիրուսով պայմանավորված իրավիճակն Իրանում: Թեպետ նախկինում սպասվում էր, որ հունիսից հետո վիճակը կամաց-կամաց կբարելավվի ու վարակման դեպքերը կնվազեն, սակայն տեղի ունեցավ ճիշտ հակառակը: Հատկապես կրիտիկական վիճակում է իրավիճակը Իրանի մայրաքաղաք Թեհրանում: Այս մասին էլ կիրակի օրվա մամուլի ասուլիսի ժամանակ է հայտաարել իրանի առողջապահության փոխնախարար իրաժ հարիրիչին:

Պարզվում է, միայն Թեհրանի՝ կորոնավիրուսային հիվանդության բուժման մեջ մասնագիտացած հիվանդանոցներ ամեն օր ընդունվում է կորոնավիրուսով վարակված 600-ից ոչ պակաս հիվանդ:

Վիճակագրությունը փաստում է, որ Իրանում արդեն յուրաքանչյուր հինգերորդ մահը գրանցվում է կորոնավիրուսից: Այս ամսվա սկզբին Իրանը «թարմացրել էր» նախկինում սահմանած իր ռեկորդները՝ գրանցելով ամենից շատ թվով մահերը՝ օրական կտրվածքով: Հենց այդ օրերին Իրանի նախագահ Հասան Ռոհանին հայտարարել էր, որ ուսումնասիրությունները ցույց են տվել, եթե չկարողանան նվազեցնել կորոնավիրուսի տարածման գերարագ տեմպերը, երկրում վարակվածների թիվը կարող է շատ շուտով հասնել 25 միլիոնի։Ամբողջ հուլիս ամսվա ընթացքում զգալի աճել է կորոնավիրուսից մահացությունը ողջ երկրի տարածքում, ընդ որում, տարիքային շեմն արդեն իջել է:

Չնայած այն հանգամանքին, որ Իրանը համավարակի հենց սկզբի ամիսներին դարձավ կորոնավիրուսի ամենախոցելի թիրախներից մեկը, այնտեղ խիստ կարանտինային միջոցառումները չափազանց ուշ սահմանվեցին եւ առաջիններից մեկը հենց Իրանում որոշվեց ահնել մտցված սահմանափակումները: Դիմակներ կրելու հորդորը պարտադիր դարձավ հունիսի վերջին միայն, մինչ այդ՝ առողջապահական գերատեսչությունները միայն հորդորում էին հետեւել կանոններին:

Երկրի առողջապահական համակարգն արդեն իսկ գտնվում է կաթվածահար վիճակում: Բանն այն է, որ առանց այն էլ քայքայված համակարգի աշխատանքը չափազանց դժվարացնում են ԱՄՆ-ի կողմից սահմանված պատժամիջոցները, որոնք շատ դեպքերում անհնարին են դարձնում անհրաժեշտ բուժմիջոցների ներկրումը երկիր, ինչպես նաեւ համապատասխան կառույցների հետ համագործակցությունների հնարավորություններն ու օգնության փոխանցումը: իրանի առողջապահության նախարարությունը հայտարարել է, որ անկարող կլինի դիմանալ, եթե եւս մի քանի միլիոն վարակակիրների մասին կանխատեսումներնհ իրականություն դառնան:

Դեռ մարտին հայտարարվեց, որ Իրանը գործ ունի աշխարհում կորոնավիրուսի խոշորագույն բռնկումներից մեկի հետ։  Երկրում մարդիկ մտավախություն ունեին, որ կառավարությունը թաքցնում էր վարակի տարածման իրական մասշտաբները, իսկ Covid-19–ի հետ կապված իրավիճակը կարող է շատ արագ վատթարանալ։ Դեռ այդ ժամանակ Իրանի առավել տուժած շրջաններից երեքի՝ Գիլանի, Գոլեստանի եւ Մազանդարանի՝ կորոնավիրուսի բուժմամբ զբաղվող բժիշկները միջազգային լրատվամիջոցներին պատմել էին, որ իրենք ընդհանրապես թեստեր չունեն, դեղորայքի պաշարները խիստ սահմանափակ են: Այդ թվում, խոսքը բուժման ընթացքում հիմնական կիրառություն ունեցող դեղամիջոցների մասին էր:

Բժիշկները նշել էին, որ թթվածնի բալոնների, դիմակների, պաշտպանիչ ձեռնոցների, խալաթների պակաս կա։ Ամիսներ անց, պարզվում է, իրավիճակը դարձյալ շարունակում է դժվարին մնալ:

Իրանում վարակվածների թվի կտրուկ աճ տեղի ունեցավ, երբ վերը նշվածին գումարվեց այն, որ համաճարակի ամենաթեժ պահին իշխանությունները չհրաժարվեցին խորհրդարանական ընտրությունների անցկացումից: Ամենաշատ վարակակիրների մասին հայտնի դարձավ ապրիլին տեղի ունեցած ընտրությունների երկրորդ փուլից հետո: Բացի այդ, երկրում առհասարակ չեն փակվել մզկիթները եւ նամազի ժամին մեծաքանակ խմբերով քաղաքացիները շարունակում էին դուրս գալ աղոթքի:

Այժմ արդեն, երբ երկրում առողջապահական եւ համաճարակային ծայրահեղ լարված իրավիճակ է ստեղծվել, սկսել են խիստ ուշադրության տակ առնվել դիմակների պարտադիր կրումը, հանրային վայրերում մարդկանց կուտակումները, փակվել են զբոսանքի ամենամեծ հանրային վայրերը, այդ թվում՝ կենդանաբանական այգիները և լողավազանները, չեն գործում սրճարանները:

Ավելի վաղ 16 երկրներ հայտարարել են, որ վարակն առաջին անգամ իրենց երկիր է ներթափանցել Իրանի տարածքից։ Դրանք Հարավային Կովկասի բոլոր 3 երկրներն են՝ Ադրբեջանը, Հայաստանն ու Վրաստանը։ վարակն Իրանից է փոխանցվել նաեւ դեպի Իրաք, Աֆղանստան, Բահրեյն, Քուվեյթ, Օման, Լիբանան, ԱՄԷ, Կանադան, Պակիստան, Էստոնիա, Նոր Զելանդիա, Բելառուս, Քաթար։ Առողջապահական ոլորտի մասնագետները կանխատեսում են, որ առաջիկա ամիսներին իրանում իրավիճակն ավելի է վատթարանալու: