Երեկ ԱԺ-ում քննարկված հարցը վերաբերում էր ոչ թե քվոտաներին, այլ՝ ԱԱՀ-ից ազատմանը. Պապոյան

Եվս 1 տարով կերկարաձգվի ԱԱՀ-ից ազատման արտոնությունն այն քաղաքացիների համար, ֆիզիկական և իրավաբանական այն անձանց համար, որոնք էլեկտրական շարժիչով մեքենաներ են ներմուծում: Այդ մասին Ազգային ժողովի՝ դեկտեմբերի 2-ի նիստին ասել էր էկոնոմիկայի նախարար Գևորգ Պապոյանը:

Նախարարը ստացել է հարցեր ներմուծվող էլեկտրական շարժիչով մեքենաների քվոտաների մասին, այդ պատճառով Ֆեյսբուքում տեղադրել է տեսանյութ, որտեղ նշվում է, որ երեկ ԱԺ-ում քննարկված հարցը վերաբերում էր ոչ թե քվոտաներին՝ մաքսատուրքերից ազատմանը, այլ՝ ԱԱՀ-ի վճարմանը:

«Երբ որ դուք բերում եք արտասահմանից մեքենա Հայաստան, սովորաբար անում ենք երկու մեծ կարևոր ֆինանսական գործողություն.

1. վճարում ենք ԱԱՀ

2. մաքսազերծում ենք իրականացնում՝ վճարում ենք մաքսատուրք:

Մենք այս նախագծով 2026 թվականի համար 2024, 2025, 2026 թվականների արտադրության էլեկտրամոբիլներին ազատում ենք ԱԱՀ-ից: Այսինքն` այդպիսի հարկ չեք վճարի էլեկտրամոբիլ Հայաստան ներմուծելու դեպքում»,- նշել է նա: