Մասկը հայտնել է «Թվիթեր»-ը գնելու պայմանը

Ամերիկացի ձեռնարկատեր Իլոն Մասկը հայտարարել է, որ կարող է վերաթարմացնել «Թվիթեր»-ը գնելու գործարքը, եթե ընկերությունը կարողանա ապացուցել սոցցանցի օգտահաշիվների իսկությունը: «Արմենպրես»-ի փոխանցմամբ, այս մասին նա գրառում է կատարել «Թվիթեր»-ի էջում:

«Եթե «Թվիթեր»-ը պատահաբար ընտրի 100 օգտահաշիվ և ուղղակի ցույց տա, թե ինչպես է ապացուցում դրանց իրական լինելը, ապա գործարքը կկնքվի ամենասկզբնական պայմաններով»,- հայտնել է նա:

Ապրիլին «Թվիթեր»-ի ղեկավարությունը հայտնել էր, որ Մասկն առաջարկել է գնել այն 44 մլրդ ԱՄՆ դոլարով: Մայիսին ձեռնարկատերը տեղեկացրեց, որ փորձում է ստանալ տեղեկատվություն այն մասին, որ «Թվիթեր»-ում կեղծ օգտահաշիվները 5 տոկոսից պակաս են:

Հուլիսի սկզբին Մասկի իրավաբանները տեղեկացրել էին «Թվիթեր»-ին, որ նա հրաժարվում է սոցցանցը գնելու մտադրությունից, քանի որ ընկերությունը չի կատարել համաձայնագրով նախատեսված մի շարք պարտավորություններ, այդ թվում և ֆեյք էջերի մասին լիարժեք տեղեկատվության տրամադրումը: