Հայաստանի պետական սիմֆոնիկ նվագախմբի հետ ելույթ կունենա Միրոսլավ Կուլտիշևը

 Արամ Խաչատրյան համերգասրահում մայիսի 2-ին՝ ժամը 19։00-ին, տեղի կունենա Պենդերեցկու անվան ժամանակակից դասականների փառատոնի երկրորդ սիմֆոնիկ համերգը։

Ինչպես հայտնեցին Հայաստանի սիմֆոնիկ նվագախմբի մամուլի ծառայությունից, ծրագրում մերօրյա լեգենդների ստեղծագործություններն են՝ Վալենտին Սիլվեստրովի «HYMN 2001»-ը՝ գրված լարային նվագախմբի համար, այն նվիրված է կոմպոզիտոր Գիա Կանչելիին, Ալեքսեյ Շորի «Ճամփորդական նոթատետր» կոնցերտը դաշնամուրի և նվագախմբի համար, Լերա Աուերբախի Թիվ 1 սիմֆոնիան՝ «Քիմերա»։ Հայաստանի պետական սիմֆոնիկ նվագախմբի հետ ելույթ կունենա դաշնակահար, բազմաթիվ միջազգային մրցույթների դափնեկիր Միրոսլավ Կուլտիշևը։ Համերգը կղեկավարի միջազգային ճանաչում ունեցող դիրիժոր Միշել Թիլկինը։

Քշիշտով Պենդերեցկու անունը կրող փառատոնը նախաձեռնել և անցկացնում է Հայաստանի պետական սիմֆոնիկ նվագախումբը։ Փառատոնի նպատակներից է հայ երաժշտասերներին հնարավորություն տալ հաղորդակցվելու աշխարհի տարբեր ծայրերում ստեղծագործող մերօրյա հայտնի կոմպոզիտորների արվեստի հետ։