ԱՄՆ-ն ՆԱՏՕ-ի գլխավոր քարտուղարի պաշտոնում որևէ կոնկրետ թեկնածուի չի առաջադրում. Բլինկեն
Ամերիկայի Միացյալ Նահանգները ՆԱՏՕ-ի հաջորդ գլխավոր քարտուղարի պաշտոնում որևէ կոնկրետ թեկնածուի առաջադրելու գործով չի զբաղվում:
Ինչպես հաղորդում է «ՏԱՍՍ»-ը, այս մասին հունիսի 20-ին նշել է ԱՄՆ պետքարտուղար Էնթոնի Բլինկենը Մեծ Բրիտանիայի արտգործնախարար Ջեյմս Քլևերլինի հետ համատեղ մամուլի ասուլիսում։
«Մենք շատ սերտ խորհրդակցություններ ենք անցկացնում մեր դաշնակիցների և գործընկերների հետ՝ որոշելու, թե ուր ենք ուզում գնալ ՆԱՏՕ-ի և նրա ղեկավարության հետ»,-ասել է Բլինկենը։
Նրա խոսքով՝ ԱՄՆ նախագահ Ջո Բայդենը ներկայիս քարտուղար Ստոլտենբերգին ականավոր առաջնորդ է համարում, սակայն ըստ ԱՄՆ վարչակազմի՝ նաև այլ հեղինակավոր առաջնորդներ կան, որոնց հնարավոր է դիտարկել այդ պաշտոնում:
ԱՄՆ նախագահ Ջո Բայդենը հունիսի 8-ին չի բացառել Մեծ Բրիտանիայի պաշտպանության նախարար Բեն Ուոլեսի թեկնածությունը ՆԱՏՕ-ի գլխավոր քարտուղարի պաշտոնում, որը շուտով կազատվի։
Կարծիքներ