Բեռլինում Մերկելի հայտնի ժեստով գովազդային պաստառ է տեղադրվել (լուսանկար)

Գերմանիայում կոմերցիոն ընկերություններն ակտիվորեն կիրառում են կանցլեր Անգելա Մերկելի կերպարն իրենց գովազդներում: Դրանց թվում է ներքնակներ վաճառող ընկերությունը, որն առաջարկում է «մայրիկին» մի քիչ հանգստանալ 16 տարվա ծանր աշխատանքից հետո:

Ինչպես ներկայացնում է «ՌԻԱ Նովոստի»-ն, գովազդային պաստառներից մեկի վրա պատկերված է Մերկելի հայտնի ժեստը (մատների ծայրերով միմյանց միացված ձեռքերը), որը շեղանկյան են նմանեցնում: Իսկ կողքի պաստտառին պատկերված է ներքնակի լուսանկարը և գրություն. «Ողջույն, մայրիկ: 16 տարվա ծանր աշխատանք. այժմ դու մի քիչ հանգստի ես արժանի»:

Գովազդը տեղադրված է Բեռլինի մետրոյի կենտրոնական կայարաններից մեկում:

Հիշեցնենք, որ սեպտեմբերի 26-ին Գերմանիայում Բունդեսթագի ընտրություններ են կայացել, որոնց արդյունքում հաղթող է ճանաչվել Սոցիալ-դեմոկրատական կուսակցությունը՝ առաջ անցնելով իշխող դաշինքից: 16 տարի կանցլերի պաշտոնը զբաղեցրած Մերկելն ավելի վաղ հայտարարել էր, որ մտադիր չէ առաջադրվել: