Օտտավայում անհայտ անձը կարմիր ներկ է լցրել Ռուսաստանի դեսպանատան ցանկապատի վրա

Անհայտ անձը կարմիր ներկ է լցրել Օտտավայում ՌԴ դեսպանատան ցանկապատի վրա՝ վնասելով ՌԴ դիվանագիտական ներկայացուցչության գույքը։ Այս մասին ՏԱՍՍ-ին հայտնել է Կանադայում ՌԴ դեսպանատան խորհրդական-պատգամավոր Վլադիմիր Պրոսկուրյակովը։

«Ռուսաֆոբիայի ևս մեկ դեպք է տեղի ունեցել երկուշաբթի լույս երեքշաբթի գիշերը, երբ դիմակավորված անհայտ անձը կարմիր ներկ է լցրել դեսպանատան ցանկապատի հիմքի վրա՝ դրանով իսկ զգալի վնաս հասցնելով Ռուսաստանի դեսպանատանը: Դեսպանատունն արդեն դիմել է ոստիկանություն՝ ներխուժողին հայտնաբերելու պահանջով, պահակներին տրվել են տեսանկարահանող սարքերի ձայնագրություններ։»,-ասել է նա:

Միաժամանակ Կանադայի ԱԳՆ-ին նոտա է ուղարկվել՝ պահանջելով ապահովել ՌԴ դիվանագիտական առաքելության անվտանգությունը դիվանագիտական հարաբերությունների մասին Վիեննայի կոնվենցիայի համաձայն:

Դիվանագետն ուշադրություն է հրավիրել այն փաստի վրա, որ Մոսկվայում Կանադայի դեսպանատունը դեռ գործում է «լիակատար հարմարավետության» ռեժիմով, «քանի որ Ռուսաստանը լիովին ապահովում և հարգում է օտարերկրյա դիվանագիտական ներկայացուցչությունների իրավունքները»։ Նաև հիշեցրել է, որ կա փոխադարձության սկզբունք, «հետևաբար, վարչապետ Ջասթին Թրյուդոյի ռեժիմի շահերից է բխում ՌԴ դիվանագիտական առաքելությունների՝ ոչ միայն Օտտավայում դեսպանատան, այլ նաև Մոնրեալում և Տորոնտոյում գլխավոր հյուպատոսությունների անվտանգությունն ապահովումը։