Թրամփը հաստատել է, որ ԱՄՆ-ն գնել է կորոնավիրուսի բուժման համար օգտագործվող «Ռեմդեսիվիր» դեղամիջոցի համաշխարհային պաշարների 90%-ը

Միացյալ Նահանգների նախագահ Դոնալդ Թրամփն ուրբաթ հաստատել է, որ ԱՄՆ-ն գնել է երկրում արտադրվող «Ռեմդեսիվիր» դեղամիջոցի համաշխարհային պաշարների 90%-ը: Հիշեցնենք, որ այս դեղամիջոցն օգտագործվում է կորոնավիրուսի բուժման համար:

«Իմ վարչակազմն ամրագրել է «Ռեմդեսիվիր» դեղամիջոցի համաշխարհային մատակարարումների 90%-ը, որը մեծ ազդեցություն է ունենում կորոնավիրուսի բուժման հարցում»,- ասել է Թրամփը՝ ելույթ ունենալով Սպիտակ տանը, փոխանցում է «ՌԻԱ Նովոստի» գործակալությունը:

Հուլիսի սկզբին բրիտանական The Guardian պարբերականը գրել էր, որ ԱՄՆ-ն գնել է «Ռեմդեսիվիր» հակավիրուսային դեղամիջոցի եռամսյա պաշարների մոտ 90%-ը:

«Ռեմդեսիվիր»-ն արտահերթ կարգով մայիսի 1-ին հավանության էր արժանացել ԱՄՆ-ում COVID-19-ի բուժման գործում: Այն ժամանակին մշակվել է Էբոլայի դեմ պայքարի համար, սակայն այդ ժամանակ չէր կարողացել իր արդյունավետությունն ապացուցել: Ավելի ուշ այն իր արդյունավետությունը ցույց է տվել SARS և MERS վարակների բուժման գործում: