Սպանված փոխգնդապետ Բաբայանը ծնվել ու ապրում էր Ստեփանակերտում, Արցախի ուժային համակարգում ծառայում էր շուրջ 24 տարի

Երեկ՝ մարտի 5-ին, Ադրբեջանի ռազմաքաղաքական ղեկավարության իրականացրած հերթական ահաբեկչության հետևանքով Արցախի Հանրապետության ներքին գործերի նախարարության անձնագրային և վիզաների վարչության անձնակազմի հերթափոխի 3 ծառայող զոհվել և 1 ծառայող ծանր վիրավորում է ստացել:

Սպանված 3 ոստիկանից տարիքով ամենաավագը փոխգնդապետ Արմեն Բաբայանն էր: 46-ամյա ոստիկանն իր կյանքի շուրջ 24 տարին անցկացրել էր ծառայության մեջ և ամբողջ կյանքը՝ Արցախում: Նա բնիկ ստեփանակերտցի էր, 2 երեխայի հայր:

Նրա կենսագրությունը ներկայացնում ենք ստորև.

Ծնվել է 1976 թվականի հունվարի 7-ին Ստեփանակերտ քաղաքում:

1993-1996թթ. ծառայել է Արցախի Հանրապետության պաշտպանության բանակում:

2007 թվականին ավարտել է Ստեփանակերտի Մ. Մաշտոց համալսարանի իրավագիտություն բաժինը: 

1999 թվականին ծառայության էր ընդունվել ԼՂՀ ՆԳՆ հատուկ նշանակության ստորաբաժանումում: Ոստիկանության համակարգում ծառայել է մինչև 2008 թվականը, այնուհետև՝ ծառայությունը շարունակել ԼՂՀ ԱԱԾ-ում/2008-2012թթ/: 

2014 թվականից ծառայության էր անցել ոստիկանության պետական պահպանության վարչությունում, իսկ 2015 թվականից՝ ծառայությունը շարունակել ոստիկանության անձնագրային և վիզաների բաժնում: 

2018 թվականին նշանակվել էր ոստիկանության անձնագրային և վիզաների վարչության անձնագրային հսկողության կետերի բաժնի պետ: 

Ծառայության ընթացքում արժանացել է մի շարք խրախուսանքների: Ուներ ոստիկանության փոխգնդապետի կոչում: 

Ամուսնացած է, ունի երկու երեխա: 

Զոհվել է 2023 թվականի մարտի 5-ին «Խայփալու» կոչվող տեղանքում ոստիկանական հերթափոխի ժամանակ Ադրբեջանի զինուժի դիվերսիոն խմբի ներթափանցման հետևանքով: