Հասարակական համերաշխության առաջամարտիկը երիտասարդությունը պիտի դառնա, շնորհավորում եմ. Ատոմ Մխիթարյան

Հասարակական համերաշխության առաջամարտիկը երիտասարդությունը պիտի դառնա, շնորհավորում եմ. Ատոմ Մխիթարյան

Հայաստանի ամենամեծ երիտասարդական կազմակերպության Երիտասարդական ակումբների դաշնության նախագահ Ատոմ Մխիթարյանը շնորհավորական ուղերձ է հղել  Երիտասարդության միջազգային օրվա առթիվ, որում ասված է.

 

Սիրելի՛ երիտասարդներ

Հայաստանի ամենամեծ երիտասարդական հասարակական կազմակերպության անունից ի սրտե շնորհավորում եմ Երիտասարդության միջազգային օրվա՝ օգոստոսի 12-ի առթիվ:

Յուրաքանչյուր հասարակության առաջընթացի գրավականը երիտասարդությունն է, եթե երիտասարդները ձգտում են լինել կրթված ու խելացի, հաստատակամ իրենց ակնկալիքներում ու մասնակցում են որոշումների կայացման գործընթացներին, իսկ պետությունը խրախուսում է նրանց բոլոր նախաձեռնությունները։

Երիտասարդական ակումբների դաշնությունն իր բազմաթիվ ու բազմապիսի ծրագրերով մշտապես աջակցում է երիտասարդությանը՝ նրան զարգացման հնարավորություններ ընձեռելով ու ներուժն ուղղորդելով մեր ժողովրդի առջև ծառացած մարտահրավերների հաղթահարմանը:

Այսօրվա մեր գերխնդիրը հասարակական համերաշխության հաստատումն է, որի առաջամարտիկը պետք է դառնա երիտասարդությունը: Այս առումով ԵԱԴ 100-ից ավելի ակումբներ ու կենտրոններ, երիտասարդական ՀԿ-եր ու նախաձեռնություններ օգոստոսի 12-ին իրականացնելու են տեղական ծրագրեր՝ ֆլեշմոբեր, հանդիպում-քննարկումներ, քարոզարշավներ, սեմինարներ, մրցույթներ, գրական երեկոներ, քայլարշավներ, սպորտային միջոցառումներ, որոնց ընդհանուր խորագիրը ՀԱՄԵՐԱՇԽՈՒԹՅՈՒՆՆ է լինելու:

Եվս մեկ անգամ շնորհավորում եմ, մաղթում արդյունավետ գործունեություն ու համերաշխություն՝ ի շահ մեր ժողովրդի:

 

1999 թ. դեկտեմբերի 17-ին ՄԱԿ-ի Գլխավոր ասամբլեայի որոշմամբ օգոստոսի 12-ը հռչակվեց Երիտասարդության միջազգային օր։ Այն ընդունվել է 1998 թ. օգոստոսի 12-ին Լիսաբոնում անցկացված երիտասարդության հարցերով նախարարների համաշխարհային խորհրդաժողովի առաջարկությամբ։ Տոնը հռչակվել է երիտասարդությանն ուղղված գործողությունների համաշխարհային ծրագրի մասին երիտասարդության իրազեկության բարձրացմանը նպաստելու նպատակով:

Երիտասարդական ակումբների դաշնությունը հիմնադրվել է 1999թ։ Այսօր ԵԱԴ-ը միավորում է ավելի քան 100 երիտասարդական մասնագիտական և տարածքային ակումբներ, կենտրոններ և կազմակերպություններ՝ դառնալով Հայաստանի ամենամեծ երիտասարդական կառույցը։