Պենտագոնից արտահոսած ոչ բոլոր փաստաթղթերն են ճշգրիտ. Ջեյմս Հիփի

Պենտագոնից արտահոսած ոչ բոլոր փաստաթղթերն են ճշգրիտ: Այս մասին հայտարարել է Մեծ Բրիտանիայի պաշտպանության փոխնախարար Ջեյմս Հիփին:

«ԱՄՆ պետքարտուղարը, ԱՄՆ պաշտպանության նախարարությունը և Ֆրանսիայի պաշտպանության նախարարությունն արդեն ասել են, որ արտահոսքի ոչ բոլոր տեղեկություններն են ճշգրիտ: Չեմ կարող ասել, թե այդ տեղեկատվության որ մասն է ոչ ճշգրիտ, քանի որ դա վերաբերում է գաղտնի հետախուզական տեղեկատվությանը»,- ասել է նա:

Ավելի վաղ ԱՄՆ-ի առաջատար լրատվամիջոցներից NBC News-ը գրել էր, որ ԱՄՆ պաշտպանության նախարարությանը (Պենտագոն) պատկանող փաստաթղթերի արտահոսք էր տեղի ունեցել։

Հիշեցնենք՝ ԱՄՆ արդարադատության նախարարությունը հետաքննություն է սկսել Պենտագոնի գաղտնի փաստաթղթերի արտահոսքի և դրանք համացանցում հայտնվելու վերաբերյալ:

ԱՄՆ գլխավոր դատախազ Մերրիկ Գարլանդը հաստատել էր, որ Մասաչուսեթսում ԱՄՆ ռազմաօդային ազգային գվարդիայի 102-րդ հետախուզական ստորաբաժանման 21-ամյա աշխատակից Ջեք Թեյշեյրը ձերբակալվել է Պենտագոնի գաղտնի փաստաթղթերի արտահոսքի մեջ ներգրավված լինելու կասկածանքով։