Հայաստանը խաղաղության պայմանագրի որ տարբերակն էլ ընտրի, եթե այն կհանգեցնի խաղաղության, մենք միայն կողմ ենք․ Պուտին

Վալդայի համաժողովի շրջանակում Ռուսաստանի նախագահ Վլադիմիր Պուտինն այլ հարցերի թվում անդրադարձել է նաև Ղարաբաղյան հիմնախնդրին ու նախկին բանակցային փաթեթներին։

Վլադիմիր Պուտինը նշել է, որ այսօր Հայաստանի և Ադրբեջանի միջև անհրաժեշտ է խաղաղության պայմանագիր, և Մոսկվան աջակցում է խաղաղ կարգավորմանը, ինչպես նաև սահմանների սահմանազատման և սահմանային խնդիրների ամբողջական կարգավորմանը:

«Արդեն Հայաստանի գործն է, թե պայմանագրի որ տարբերակն ընտրի։ Բայց որ տարբերակն էլ ընտրի, եթե այն կհանգեցնի խաղաղության, մենք միայն կողմ ենք: Բայց մենք չենք պատրաստվում և չենք կարող ոչինչ ստիպել կամ թելադրել։

Մենք չենք կարող և չենք պատրաստվում Հայաստանին որևէ բան թելադրել։ Եթե հայ ժողովուրդը և Հայաստանի ներկայիս ղեկավարությունը կարծում են, որ պետք է ընտրել խաղաղության պայմանագրի ինչ-որ կոնկրետ տարբերակ, այսպես կոչված Վաշինգտոնյան համաձայնագիրը, որը ինչքան հասկանում եմ, նախատեսում է Ղարաբաղի նկատմամբ Ադրբեջանի ինքնիշխանության ճանաչումը՝ խնդրեմ։ Դե, եթե Հայաստանն այդպես է կարծում»,- շեշտել է ՌԴ նախագահը։

Ըստ ՌԴ նախագահի, եթե ՀՀ իշխանությունները գտնում են, որ Ղարաբաղն ունի որոշակի առանձնահատկություններ, որոնք պետք է հաշվի առնել և ներառել ապագա խաղաղության պայմանագրում, այդպես ևս կարելի է։

«Բայց, իհարկե, պետք է բանակցել Ադրբեջանի հետ։ Այդ պայմանավորվածությունները պետք է ընդունելի լինեն նաեւ մյուս կողմի՝ Ադրբեջանի համար։ Սա շատ բարդ և, անկեղծ ասած, ծանր հարց է»,- նշել է Պուտինը:

ՌԴ նախագահը նաև այլ ընդգծում է արել․ «Հայաստանը մեր ռազմավարական գործընկերն է և դաշնակիցը։ Մեծ չափով, նկատի ունենալով Ադրբեջանի շահերը, կկենտրոնանանք Հայաստանի առաջարկի վրա»,-ասել է Վլադիմիր Պուտինը։