Սողոմոնյան կղզիների մայրաքաղաք Հոնիարայում ցուցարարները թալանել են խանութները և այրել տները
Հակակառավարական ցուցարարները Սողոմոնյան կղզիների մայրաքաղաք Հոնիարայում հրդեհել են շենքեր և թալանել խանութներ։ Ինչպես ՏԱՍՍ-ի հաղորդմամբ՝ հայտնել է RNZ ռադիոկայանը, անկարգությունների պատճառով պետական կառույցների և ծառայությունների մեծ մասի աշխատանքը դադարեցվել է։
Ըստ ռադիոկայանի՝ չորեքշաբթի օրը Սողոմոնյան կղզիներում սկսված հակակառավարական ցույցերը վերաճել են լայնածավալ անկարգությունների, որոնք ընդգրկել են Հոնիարայի արևելյան շրջանների մեծ մասը: Քաղաքում սննդի, դեղորայքի և առաջին անհրաժեշտության ապրանքների պակաս կա, մի շարք թաղամասերում անջատվել է էլեկտրաէներգիան և ջուրը։
Սողոմոնյան կղզիների վարչապետ Մանասե Սոգավերը հայտարարել է, որ քաղաքում բողոքի ցույցերը կազմակերպվել են տերությունների կողմից, որոնք հավանություն չեն տվել Թայվանի հետ դիվանագիտական հարաբերությունները խզելու կղզու կառավարության՝ 2019 թվականի աշնանը ընդունված որոշմանը։
Ինչպես հայտնում է Solomon Times տեղական թերթը , Ավստրալիայի դաշնային ոստիկանությունն արդեն ժամանել է Հոնիարա, և սպասվում է, որ Ավստրալիայի ռազմածովային ուժերի ռազմանավերից մեկը կժամանի մոտակա ժամերին:
Նաև Սողոմոնի կղզիներին ռազմական օգնության մասին որոշում է կայացրել Պապուա Նոր Գվինեայի կառավարությունը՝ խոստանալով մոտ 30 խաղաղապահ ուղարկել հարևան պետություն։
Գործակալության տվյալներով՝ իրավապահներին հաջողվել է ցրել ամբոխը եւ ցուցարարներին հետ մղել դեպի մայրաքաղաք Հոնիարա կենտրոն։
Նոյեմբերի 24-ին Հոնիարայում հակակառավարական ակցիայի մասնակիցները փորձել են գրոհել խորհրդարանի շենքը և հրկիզել այն։ Իրավապահների միջամտությունից հետո ցուցարարները սկսել են թալանել ու հրկիզել խանութները, դպրոցներն ու ոստիկանական բաժանմունքները: Հայտնի է, որ ակցիան կազմակերպել և ղեկավարել են Մալայտա նահանգի բնակիչները, որը գտնվում է արշիպելագի արևելքում գտնվող համանուն կղզում։ Նրանք իշխանություններին մեղադրում են տարածաշրջանը զարգացնել չցանկանալու և նրա տարածքում մի շարք խոշոր ծրագրեր իրականացնելուց հրաժարվելու մեջ։
Կարծիքներ